Parlamentu Nasionál (PN), liu husi reuniaun Plenária ordinária, iha loron 27 fulan janeiru tinan 2025, halo diskute no aprova Konta Jeral Estadu ba tinan 2023 nian, bazeia ba artigo 180 Rejimentu Parlamentu Nasionál, ho votu a favor 58, konta 0 no abstensaun 0.
Debate ne’e fixa ho total horas hat liu minutu rua nulu (4h20m), ho tempu ne’e sei fahe tuir proporsaun entre Governu no Bankada Parlamentár sira. Nune’e debate hahu ho intervensaun husi Bankada Opozisaun Fretilin ho 25 minutus liga ba iha ezekusaun Orsamentu Jeral Estadu nian ba tinan 2023, ho montante total 3.16 mil milhões. Bazeia ba iha Relatoriu no Pareser Tribunal Kontas nian, Bankada Fretilin rejista buat barak ho kritika lubun ida ho objetivu atu kontribui ba hadiak Jestaunn Fiskal Estadu nian liu husi IX Governu Konstitusional nia mandatu nudar ezekutor.
Tuir kedas Meza fo tempu ba Governu, liu husi Primeiru-Ministru em Ezersisu, haktuir katak Ezekutivu respeita separasaun podér tuir nia mandatu dezde IX Governu simu pose. Governu akresenta katak toma nota ba Relatóriu Tribunál Kontas nian atu hadi’a prosedimentu sira iha futuru. Ikus liu, Governu hateten katak simu ho laran-haksolok krítika no sujestaun hotu-hotu ne’ebé sei tulun Governu tuir prosedimentu legál hotu-hotu hodi evita inefisiénsia no mal-jestaun no, importante liu, iha responsabilidade morál ba povu atu kontinua serbisu hamutuk ho entidade hotu-hotu ba interese nasionál timoroan hotu-hotu nian.
Iha oportunidade ida ne’e, Komisaun C, ne’ebe trata asuntu Finansas Publikas halo mos leitura ba iha relatóriu no pareser liga ba iha Relatoriu Konta Jeral Estadu ne’ebe submete husi Tribunal Kontas Timor-Leste nian mai PN.
Ikus iha intervensaun Deputadu sira nian, hato’o sira nia apresiasaun no kritika sira no husu Governu bele resposta tuir pedidu Deputadu sira relasiona ezekuasaun OGE ba tinan 2023 ho objetivu atu evita mal jestaun iha finansas publika no importante liu maka fo moris diak ba povo no labele iha indisiu korupsaun ba osan sira ne’ebe mak aprova ona.
Reuniaun ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Primeiru-Ministru em Ezercsisiu, Francisco Kalbuadi Lay ho nia komitiva sira.FIM
