Prezidente Parlamentu Nasionál (PPN), Maria Fernanda Lay, akompaña husi Sekretária Meza, Virginia Ana Belo, Embaixador Timor-Leste ba Reinu Unido, Joao Paulo da C. Rangel no Diretores ba Asuntu Externo sira husi Ministériu Negosiu Estranjeiru no Kooperasaun Timor-Leste nian, simu vizita kortezia husi Deputada hanesan mos adjunta Ministra Negosiu Estranjeiru ba Asuntu Indo-Pasifiku Reinu Unidu nian, Catherine West ho nia delegasaun sira, iha loron 24 fulan janeiru tinan 2025, iha Sala Konferénsia Parlamentu Nasionál nian.
Reuniaun ne’e, ho objetivu atu koalia kona-ba kooperasaun bilateral entre pais rua, liu husi servisu interparlamentar sira iha área hanesan, dezenvolvimentu ba demokrasia, kestaun ekonomia relasiona ho trabalhador Timor-oan iha Reinu Unidu, mudansa klimatika no mós asuntu sira lejislasaun nian ne'ebé relasiona ho fiskalizasaun fiskál, inklui troka ideia kona-ba kontrolu servisu governu nian ba jestaun di’ak osan povu nian atu nune’e bele prevene korrupsaun iha Timor-Leste.
Durante reuniaun refere, Prezidente Parlamentu konsidera katak liu husi kooperasaun entre Governu nasaun rua nian ne’ebe iha ona bele servisu diak liu tan atu hasa’e kapasidade traballadór timoroan sira nian atu nune’e sira labele limita de’it hodi kompete ba serbisu ho nivel ki’ik, maibé bele mós hakarak buka serbisu ho nivel aas, nune’e fó benefísiu pozitivu liután ba dezenvolvimentu ekonómiku parte rua nian
Prezidente Parlamentu fó hanoin katak Timor-Leste nu’udar nasaun illa ki’ik ida ne’ebé foin lalais ne’e hahú nia dezenvolvimentu, presiza apoiu no interkambiu ho nasaun dezenvolvidu sira, espesialmente Reinu Unidu, iha área sira ne’ebe mensiona iha leten. Ikus liu, Prezidente, lori Povu Timorense no Parlamentu Nasionál nia naran, agradese vizita ne’e no hato’o agradesimentu sinseru ba Liurai, Estadu no Povu Reinu Unidu nian ba sira-nia apoiu ba Timor-Leste iha área oioin dezde luta Timor-Leste nian ba ukun rasik an.
Hafoin reuniaun refere, Prezidente ho nia delegasaun sira seluk entrega prezente ba Vise-Ministra ho nia komitiva, nu’udar símbolu atu hametin relasaun amizade entre Parlamentár sira, no nu’udar dalan atu promove produtu lokál timoroan sira nian, atu nune’e sira hanoin Timor-Leste iha sira nia fuan. Hafoin enkontru, sira halo vizita ba Salaun Plenária hodi haree diretamente infraestrutura Parlamentu Nasionál nian. FIM
