Parlamentu Nasionál liu husi reuniaun plenária ordinária, iha loron 21 fulan janeiru tinan 2025, Mesa anúnsiu admisaun no baixa ba Komisaun A, ne’ebé trata asuntu Konstitusionál no Justisa, Proposta Lei n.º 15/VI (2.ª) – Alterasaun dahuluk ba Lei n.º 1/2017, data 18 janeiru, Tranzitóriu ba Rekrutamentu Majistradu no Defensór Públiku sira ne'ebé la'ós timoroan, no alterasaun daruak ba Lei n.º 9/2011, data 17 agustu, ne’ebé aprova orgánika Kámara Kontas Tribunál Superiór Administrativu, Fiskál no Kontas nian.
Relativamente ho Proposta Lei n.º15/VI(2.ª), Governu hato’o pedidu ho karater urjenzia, ho nune Presidente Parlamentu em exersisiu hato’o ba Komisaun A atu reune iha 24 horas nia laran, hodi emite relatóriu no pareser, nune bele aprezenta no aprova iha plenária extraordinária ne’ebé sei realiza iha loron 22 fulan janeiru tinan 2025.
Alén de ne’e, Bankada Parlamentar FRETILIN, hato’o deklarasaun politika kona-ba eviksaun ba populasaun iha Díli no Baucau. Bankada KHUNTO koalia kona-ba Dezafius Edukativus iha Timor-Leste. Bankada PLP koalia kona-ba lista edital veteranus nian ne’ebé hamosu polemika iha públiku.
Entretantu, iha intervensaun diversas, Deputadu sira hato’o sira-nia preokupasaun relasiona ho difikuldade ne’ebé eziste iha setór oi-oin hanesan infraestrutura bazika, edukasaun, saúde, problema eviksaun; nune’e mós problema ba koto no fore-rai ho tonelada 102 ne’ebé la apropriadu ba konsumu ne’ebé estraga iha lixeira Tíbar husi AIFAESA no CLN. Deputadu sira husu atu loke eskola Filial UNTL, no-mos emisaun passaporte no karta kondusaun iha kada munisipiu, no koalia mos kestaun importante sira seluk ne’ebé precisa atensaun husi Governu.
Sesaun Plenária ne’e, prezide husi Prezidente Parlamentu Nasionál exerzisiu, Maria Terezinha da Silva Viegas, akompaña husi membru Meza sira no hetan prezensa husi Vise-Ministru ba Asuntu Parlamentár, Aderito Hugo da Costa. FIM
