Iha 22 fevereiro, Deputado Aniceto Guterres representa Comissão A iha mesa redonda ho lema “Integridade hanesan Chave ba Luta Contra Corrupção”, ne’ebé Comissão Anti-Corrupção (CAC) organiza hodi comemora ninia aniversário ba dala haat.
Iha ninia intervenção, Deputado Aniceto Guterres explica saida maka sistema nacional integridade nian no nia lança desafio ida ba Timor-Leste atu hala’o avaliação ba ninia sistema integridade rasik atubele identifica fraqueza ne’ebé iha no proposta atu halo di’ak liután.
Avaliação tipo hanesan ne’e nu’udar iniciativa ne’ebé mosu tinan hirak liubá husi “Transparency International”, organização ida ho sede iha Berlin, ne’ebé propõe abordagem holística ba transparência liuhosi análise ba instituição principal sira sociedade nian: polícia, tribunal sira, parlamento no mídia.
Avaliação ba Sistema Nacional Integridade nian examina estrutura formal instituição ida-idak nian no prática institucional iha realidade. Análise ne’e sublinha diferença ne’ebé iha entre disposições formais no realidade iha terreno, no hatudu saida mak sei bele halo sai di'ak liután.
Deputado ne’e mós lança desafio atu hametin integridade instituição sira-nian liuhosi halo instituição sira baseia ba valores.
