Parlamentu Nasionál, liu husi reuniaun plenária ordinária, iha loron 7 fulan janeiru tinan 2025, aprova votu pezar ba saudozu Tom Hyland ho votu 49 a favor, 0 konta no 0 abstensaun.
Votu pezar ne’e ho objetivu atu fó onra no valorizasaun ba saudozu Tom Hyland nia kontribuisaun iha luta ba Liberdade no Independénsia Timor-Leste nian, no ninia defeza ba Direitus Umanus, envolve iha kampaña sensibilizasaun komunidade internasionál durante okupasaun, no mós kontribui ba konstrusaun Estadu hafoin Independénsia. Parlamentu Nasionál mós hakarak hatudu agradesimentu Estadu Timor-Leste no povu timoroan nian.
Iha reuniaun plenária dahuluk ba tinan 2025 nian ne’e, liu husi intervensaun Deputadu sira nian, kontinua hato’o Boas Festas Santo Natal no Bom Ano Novo ba família no povo doben Timor-Leste hotu. Alén de ne’e, kestaun seluk ne’ebé Deputadu sira lamenta maka kona-ba eviksaun ne’ebe mak Governu liu husi Sekertariu Estadu Toponimia no Organizasaun Urbana (SEATOU) ho nia equipa sira halo hasoru komunidade afetadu sira ho uma kain total hamutuk 288 (atus rua, walu nulu resin walu) iha Fomentu II. Deputadu sira husu SEATOU atu kria kondisaun dignu ba komunidade afetadu sira antes muda sira nia propriede no trata sira ho dignu tuir Konstituisaun haruka.
Liga ba asuntu eviksaun nian, iha parte seluk Deputadu balun aseita ho atuasaun SEATOU relasioana ho ordenamentu sidade Dili tuir lei haruka, no importante liu maka atu evita komunidade sira husi fatin risku nune’e labele ariska sira nia vida, tamba ne’e husu ba Governu atu kontinua tau matan ba sira liu husi orsamentu ne’ebe maka prevê ona ba família efetadu sira nune’e bele kontinua moris normal.
Aleim de eviksaun, Deputadu sira mos preokupa ho inundasaun ne’ebe mak estraga edifisiu kompaña Naval no komunidade afetadu sira nia uma iha Hera, estrada no ponte ne’ebe maka at iha teritoriu laran tomak, engarafamentu iha sidade Dili inklui asuntu importante sira seluk, nune’e husu ba Goveru, liu husi Ministeriu relevante sira atu halo atuasaun lalais nune’e povo bele hala’o sira nia atividade ho diak.
Reuniaun ba dahuluk iha tinan 2025 ne’e, Meza mos hahu reuniaun ne’e ho ezekusaun Hino Nasional no kontinua kedas ho anunsiu distribuisaun informasaun konaba vizita privada Prezidente Republika nian ba Republika Indonésia no mos halo anunsiu ba distribuisaun no apresiasaun relatoriu fiskalizasaun Komisaun Infrastrutura ba Munisipiu Dili, Bobonaru no Manatuto.
Enkuantu, iha intervensaun Politika Bankada Parlamentar nian, Bankada Fretilin hato’o nia solidadridade no empatia ba komunidade Fumentu II ne’ebé hetan afetadu husi Eviksaun, lidera husi SEATOU. Bankada Fretilin hato’o nia lamentasaun ba atuasaun ne’ebe maka SEATOU halo hasoru komunidade afetadu sira la ho dignu, forsadu no la tuir Konstituisaun haruka tanba la-kria fatin dignu ba komunidade afetado sira antes halo eviksaun .
Reuniaun Plenaria ne’e prezide husi Presidente Parlamentu Nasional em Exercício, Maria Terezinha da Silva Viegas, akompaña husi membru Meza sira no hetan prezensa husi Vise-Ministru ba Asuntu Parlamentar, Adérito Hugo da Costa. FIM
