Prezidente Parlamentu Nasionál, Maria Fernanda Lay, akompaña husi Chefe Bankada Parlamentar CNRT, FRETILIN, PD, KHUNTO no PLP, nomos Prezidente Komisaun B, simu delegasaun China, ne’ebé lidera husi Vise-Ministru Negosius Estranjeirus China nian, iha loron 17 fulan dezembru tinan 2024, iha Sala Konferénsia Parlamentu Nasionál nian.
Depois de Enkontru Prezidente Parlamentu Nasionál ba jornalista sira hatete, Vizita ne’e espesial tebes tuir kordenasaun Embaixada China nian iha Timor-Leste. Akresenta katak Alein de hato’o agradesementu ba kooperasaun sira durante ne’e, iha futuru planu estrategiku balun bele konta ho prezensa ou apoiu China nian, hodi diskuti ba kriasaun kampu de trabalho ba joven sira, inklui mos areas sira ne’ebe mak importante hanesan agricultura, irigasaun no seluk tan.
Prezidente Parlamentu Nasionál hatete mos katak, China hare partisipasaun Timor-Leste nian iha ASEAN, mesmo nasaun ne’ebé kiik entre nasaun vizinho sira, maibe, nafatin kria estabilidade. Mensagen diak ne’ebé hatoo husi Vice-Ministru mak, “iha kooperasaun entre nasaun sira tenki iha sinceridade, tenki iha respeitu mútuo entre ema ho ema, atu nune bele dezemvolve parte rua, nune bele manan hotu iha kooperasaun ne’e”.
Entretantu, iha reuniaun ne’e China mos promete sei foka liu areas ne’ebe espesifiku hodi fo apoiu, no iha futuru ita mos bele husu apoiu iha telekomunikasaun, no asesu ba eletrisidade no seluk tan. FIM
