Vise-Prezidente Parlamentu Nasionàl (VPPN), Alexandrino Afonso Nunes, reprezenta Prezidente Parlamentu Nasionál, akompaña husi reprezentante Vise-Primeiru-Ministru no Ministru Koordenador ba asuntu Sosial no Ministru Dezenvolvimentu Rural, José Honório hamutuk ho konvidadu honrado sira seluk halo abertura ba Konferénsia Nasionál ba Lei Nu. 6/2023, loron 1 fulan marsu nian - Lei Protesaun ba Labarik no Joven iha Perigu, ne’ebé organiza husi Komisaun F, nébe trata asuntu, Saude, Seguransa Sosial no Igualdade Jenéru, ho tema "Garante Protesaun ba Labarik no Joven iha Timor-Leste", iha Salaun Administrasaun Munisipiu Ermera nian, iha loron 12 fulan dezembru tinan 2024.
Iha diskursu abertura Vise-PPN nian hateten “lori Parlamentu Nasionál nia naran nafatin apoiu ba atividade no servisu Komisaun F nian ba produsaun lei refere ho kolaborasaun ho entidade relevante sira atu fiskaliza ba entidade xave sira nia implementasaun ba lei refere iha baze”.
Vise-PPN mos apela atu UNICEF parseria nafatin ho komisaun F inklui organizasaun relevante sira seluk hodi servisu hamutuk nune'e bele trata ho seriedade ba asuntu labarik no Joven iha Timor-Leste tuir papel idak-idak nian.
Iha sorin seluk, Prezidente Komisaun F, Maria Gorumali Barreto iha nia mensajen afirma katak objetivu ba realizasaun konferénsia munisipál ne'e, iha kualidade fiskalizasaun nian, para bele recolha informasaun husi instituisaun implementador ba lei refere iha baze nune'e sai hanesan materia importante ba Komisaun F hodi halo seguimentu ba lei refere tuir nesesidade no rekomendasaun komunidade nian.
Iha oportunidade ida ne'e mos, Reprezentante UNICEF iha Timor-Leste, Patricia Digiovani hato'o nia lia menon katak "produz lei ne'e importante maibe importante liu mak ninia implementasaun ba lei refere ne'e to iha nebe no oinsa atu hadiak para bele asegura duni direitu lolos ba labarik sira iha perigu laran"
Orador sira ba konferénsia ne'e mak hanesan reprezentante husi Ministériu Solidariedade Sosial no Inkluzaun, Provedor ba Direitu Humanu no Justisa, Virgílio Guterres, Reprezenta Ministério Públiku, Prezidente INDDICA (Instituição para a Defesa de Direito as Crianças), Dinora Gardaneiro, Reprezenta Polícia VPU Munisipiu Ermera, Representa Ministério Juventude no Desportu.
Konferensia ne’e konta mos ho participante sira husi Sekretáriu-Jeral Adjuntu Parlamentu Nasionàl nian, João Rui Amaral ho nia komitiva, Estudante, Juventude, Reprezente Administrador Posto sira, Chefe Suku, Reprezenta Komandante Esquerda Polísia Munisipiu Ermera, Diretur Nasionál sira, Prezidente Autoridade Munisipiu Ermera, José Martinho d. Santos Soares no reprezentante Sosiedade Sivil. FIM
