Sekretariu-Jeral Parlamentu Nasionál, Edgar Sequeira Martins, akompaña husi Diretora Rekursu Humanu, Xefe Sentru Formasaun no Diretur Nasionál sira husi Komisaun Funsaun Publika nian halo abertura ba formasaun hodi prepara ba Konskursu Interna Rekualifikasaun Funsionariu Parlamentar sira, iha loron 2 fulan dezembru tinan 2024, iha Sala Formasaun Eis- Edifisiu Ministeriu Finansas nian.
Iha abertura ne’e, Sekretariu-Jeral hatete “konkursu ne’e loke ba funsionariu parlamentar sira ne’ebé maka iha ona faze atu halo rekualifikasaun ba nível Tékniku Superior nian, tamba ne’e oportunidade diak tebes atu funsionariu sira aproveita no hasae sira nia abilidade ou kompetensia hodi bele kompriende diak matéria sira hodi partisipa iha teste eskrita ne’ebe tuir ajenda sei realiza iha loron 16 fulan dezembru tinan ida ne’e.
Ho ida ne’e, Diresaun Rekursus Humanus, liu husi Sentru Formasaun, organiza formasaun ba funsionáriu sira durante semana rua (2), hahu loron 2 to’o 13 fulan dezembru tinan 2024.
Funsionariu sira ne’ebe maka hetan oportunidade ba rekualifikasaun mak funsionáriu sira ne’ebé preenche ona kritéria, ho total ema 52, maioria husi kategoria Tekniku Profissional.
Prosesu rekualifikasaun ne’e, sei iha hela prosesu verifikasaun dokumentu nian, antes hala’o teste eskrita. FIM
