Prezidente Parlamentu Nasionál Maria Fernanda Lay, prezide abertura ba atividade kampaña loron 16 ativismu Violénsia Kontra Feto no Labarik feto, ho Tema “Hamutuk ita Prevene no Hapara Violensia Hasoru Feto no Labarik iha Timor-Leste”, iha loron 29 fulan novembru tinan 2024, iha Suku Ositako, Nitibe RAEOA.
Iha diskursu abertura Prezidente Parlamentu Nasionál nian, hatete “ho onra tebes bele mai too iha Ositako. Parlamentu aprova ona lei konaba kriminalizasaun ba atus violénsia iha uma laran, dala barak feto ho labarik mak sai vítima, tambá laiha forsa atu hasoru. Ami fiar katak husi Ositako bele sai ezemplu diak ba Suku sira seluk, iha nebe’e ema tenki hadomi malu hahu husi uma laran no, fatin iha-ne’ebé edukasaun sosiedade nian mós tenke hahú no ne’ebé remata ho asaun Estadu nian”.
Prezidente mos afirma liu tan katak, ho prezesa Prezidente Parlamentu Nasional no Membrus Deputadus sira hotu, bele lori domin mai Suku Ositaku atu nia comunidade sira bele hari familia ida ho domin, oan sira tenki hetan edukasaun hanesan husi inan aman, atu nune bele sai jerasaun futura ne’ebé diak hodi kontribui ba nasaun ida nee.
Iha violensia domestika, nee laos mane deit mak halo violénsia hasoru feto, maibé, dala ruma mos iha situasaun balun akontese kontrariu, tanba continuidade husi komportamentu violénsia sira ne’ebé hahu husi inisia forma família.
Prezidente Parlamentu Nasional mos hato’o nia esperansa atu Governu RAEOA bele ba esplika ou halo Sosializasaun ba Lei Violénsia Domestika iha Suku Ositako, atu nune povo sira bele komprende, tamba atus violénsia domestika ne’e konsidera hanesan krime publiku ida, ne’ebé bele denúnsia husi kualker ema ida ba autoridade competente sira. Violénsia domestika la-lori benefisiu ba ema nia moris, principalmente ba joven sira, precisa kria komportamentu hodi respeita hahu husi uma laran.
Partisipa iha cerimónia ne’e, Vice-Prezidente Grupu Mulheres Parlamentares Timor-Leste (GMPTL), Deputada Lusia Taeki no Membru Deputadu sira Grupo GMPTL nian, membrus Governu Regional RAEOA, Komandante Polícia RAEOA no reprezentante Sekretariu Estadu Inkluzaun no Komunidade Suku Ositako, Suku Taiboko. FIM
