Parlamentu Nasionál iha loron 8 fulan novembru tinan 2024, aprova iha jeneralidade Proposta Orsamentu Jeral Estadu ba tinan 2025 hamutuk dólar amerikanu bilaun 2.6, ho votus 42 a favor, 0 kontra no 22 Abstensaun.
Diskusaun ba jeneralidade ne’e lao durante loron tolu, hahú iha loron 6 too 8 fulan novembru tinan 2024, durante diskusaun, Deputadu sira aprezenta preokupasaun barak liga ba orsamentu no kondisaun infraestrutura no ekonomia Timor-Leste nian. Hafoin ida-ne’e, tuir giaun ne’ebé aprova ona, kada bankada parlamentar sira halo intervensaun no ikus taka ho intervensaun Primeiru-Ministru Kay Rala Xanana Gusmão nian.
Ho aprovasaun jeneralidade ne’e, Parlamentu Nasionál sei kontinua diskusaun no aprovasaun ba espesialidade iha loron 11 fulan novembru tinan 2024.
Sesaun plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan Prezensa husi Primeiru-Ministru, Kay Rala Xanana Gusmão ho membru Governu sira. FIM
