Parlamentu Nasionál liu hussi sesaun plenária extraordinária, iha loron 6 fulan novembru tinan 2024, hahú halo diskusaun iha jeneralidade ba Proposta Lei n.o 12/VI (2a) - Orsamentu Jeral Estadu (OJE) 2025.
Diskusaun OJE ne’e, hetan abertura husi Prezidente Parlamentu Nasionál, Maria Fernanda Lay, ne’ebé hahú ho exekusaun Hinu Nasionál, no Minutu ida hakmatek prezidi husi Vice-Prezidente Parlamentu Nasionál, Alexandrino Afonso Nunes. Hafoin kontinua ho leitura ba Giaun husi Sekretária Meza, Deputada Virginia Ana Belo.
Hafoin ida-ne’e, Primeiru-Ministru, Kay Rala Xanana Gusmão, aprezenta proposta OJE 2025 nian, ne’ebé sita prioridade sira iha proposta OJE refere ne’ebé sei implementa iha tinan 2025.
Proposta OJE 2025 ho total osamentu hamutuk dólar amerikanu bilaun 2.6 biloens ne’ebé fahe ba Saláriu no Vensimentu $ 474,988,165 millões, Bens no Servisus $392,892,297 millões, Transferénsias Públikas $ 762,755,046 millões, Kapital Menor $22,566,932 millões, no Kapital Dezenvolvimentu $419,778,560 millões.
Hafoin aprezentasaun proposta, Komisaun C ne’ebé trata assuntos Finansas Publikas aprezenta relatóriu no parecer Komisaun nian kona-ba Proposta OJE 2025 nian.
Iha intervensaun Bankada Parlamentar sira nian, Deputadu sira kestiona problema sira kona-ba prosesu dezenvolvimentu iha área edukasaun, saúde, infraestrutura básika, no área importante sira seluk, ne’ebé precisa hetan resposta husi Governu.
Diskusaun loron dahuluk ne’e termina iha 17h15 no sei kontinua iha loron 07 fulan novembru tinan 2024.
Sesaun Plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Mesa sira no hetan prezensa husi Primeiru-Ministru, Kay Rala Xanana Gusmão, no membru Governu sira. FIM
