Entrevista ba Presidente Grupo Nacional nian Deputado Estanislau da C. Aleixo Maria da Silva

1. Saida maka CPLP (Comunidade dos Países de Língua Portuguesa) no bainhira mak mosu?
   CPLP ne’e cria iha 1996 no, to’o agora, composta husi país sira ho lian oficial português, Angola, Brasil, Cabo Verde, Guiné-Bissau, Moçambique, Portugal, São Tomé e Príncipe ho Timor-Leste, geograficamente namkari iha África, América do Sul, Europa e Sudeste Asiático. Timor-Leste assina Estatutos CPLP nian iha 2007.
2. CPLP nia objetivo ne’e saida?
   Objetivo ida ne’ebé sai base ba criação CPLP maka hametin no hakle’an relações político-diplomáticas entre ninia membro sira, no nune’e reforça sira-nia presença iha esfera internacional.

Cooperação entre país membro sira iha área oioin, inclui justiça, educação, saúde no seluseluk tan, nu’udar objetivo ida tan husi Comunidade ne’e. No ita labele haluha mós promoção lian português.

3. Saida maka AP-CPLP (Assembleia Parlamentar Comunidade dos Países de Língua Portuguesa nian) no bainhira mak estrutura ne’e mosu?
   AP-CPLP nu’udar órgão ida CPLP nian ne’ebé constitui iha novembro 2007. Assembleia Parlamentar kaer papel fundamental ida iha Comunidade ne’e, tanba ami deputado iha responsabilidade boot tan hodi lori ba CPLP interesse husi povo sira-ne’ebé ami representa.

AP nia objetivo atu aumenta intercâmbio entre parlamento sira husi países membros iha esfera política no legislativa. Kona-ba área cooperação ikus ne’e iha esforço coordenado, kona-ba questões abrangentes, hodi buka harmonização ba leis ne’ebé vigora iha respetivos países.

4. Ita-Boot hanoin katak Parlamento Nacional de Timor-Leste nia participação iha encontro sira AP-CPLP nian importante ka lae? Vantagem hirak-ne’ebé mak Parlamento Timor-Leste nian hetan?
   La iha dúvida katak ne’e importante, atu hametin ita-nia relação cooperação husi perspetiva política, económica, social no cultural no mós presença Timor-Leste nian iha arena internacional.
5. Saida maka Grupo Nacional AP-CPLP nian? Sai Presidente Grupo Nacional AP-CPLP nian significa saida? Desafio hirak-ne’ebé mak iha?
   Grupo Nacional ne’e delegação deputados husi Parlamento ida-idak ba Assembleia Parlamentar.

Grupo Nacional composto husi deputado na’in-6 ne’ebé kaer daudaun hela sira-nia função, ne’ebé hili tuir representação proporcional iha Parlamento.

Ha’u kaer knaar nu’udar presidente Grupo Nacional nian desde 2010, quando Grupo Nacional ne’e harii. Presidente do Grupo Nacional só coordena serbisu husi membros Grupo nian ho relação ba comissões de trabalho Assembleia Parlamentar nian, mantém relação comunicação ho Grupo Nacional sira seluk husi parlamento sira CPLP nian no coordena serbisu preparatório ba reuniões AP-CPLP nian.

Desafio sira boot liu ne’ebé ita hasoru maka, essencialmente, diferença ne’ebé iha kona-ba capacidade resposta institucional, humana e tecnológica entre nação sira iha Comunidade ne’e nia laran.

6. Iha novembro 2013 delegação ida husi Parlamento Nacional hola parte iha IV AP-CPLP iha Angola. Parlamento Nacional de Timor-Leste remata tinan rua ne’ebé kaer Presidência AP nian, no hahú iha momento ne’ebá Assembleia Nacional de Angola maka kaer. Atividade hirak-ne’ebé mak relevante liu bainhira Timor-Leste kaer presidência?
   Ha’u bele dehan katak Parlamento Timor-Leste nian dinamiza AP-CPLP nia serbisu durante período ne’ebé kaer presidência. Ami promove, ho apoio husi Portugal no Brasil, reunião rua husi presidentes Grupo Nacional sira-nian, respetivamente iha Lisboa (2012) no Brasília (2013).

Ha’u hakarak mós sublinha serbisu ne’ebé PN hala’o, ho ita-nia equipa juristas, kona-ba revisão ba Estatuto e Regimento AP-CPLP nian, ne’ebé to’o iha ninia ponto importante liu ho reunião preparatória ida iha Lisboa iha agosto 2013.

Ami-nia intenção atu proposta alteração ne’e discute no vota iha V Assembleia Parlamentar, ne’ebé sei hala’o iha Díli, iha abril.

Durante ami-nia presidência, ami produz plano atividades ba Assembleia Parlamentar nia comissão tolu ne’ebé apresenta iha reunião iha Brasília no hetan aprovação iha IV Assembleia Parlamentar.

Ikus liu, ha’u hakarak sublinha serbisu ne’ebé Grupo Nacional Timor-Leste nian hala’o, iha cooperação metin ho Grupo Nacional husi Assembleia Nacional de Angola, iha preparação ba IV reunião AP-CPLP nian iha Luanda, iha novembro 2013.

Serbisu hirak-ne’e fó biban ba debate di’ak kona-ba tema atual oioin. Ha’u hakarak mós sublinha la’ós de’it contribuição ba debate durante sessões plenárias, maibé mós contribuição husi Deputadas, ne’ebé integra Rede de Mulheres da AP hodi Parlamento Nacional nia naran.

7. Iha 2014 Timor-Leste kaer presidência Conferência de Chefes de Estado e de Governo da CPLP, no tanba ne’e compete ba Timor atu organiza V Assembleia Parlamentar. Desafio hirak-ne’ebé mak iha?
   Organiza reunião boot no importante hanesan ne’e exige meios logísticos no humanos barak.

Maibé ita iha experiência husi serbisu uluk hodi hala’o III AP-CPLP ne’ebé acontece iha Díli iha setembro 2011, no ha’u laran-metin ba funcionário sira-nia empenho hodi garante reunião nia sucesso.

Tanba Timor-Leste mak sei assume presidência husi Conferência Chefes Estado no Governo nian husi CPLP, ne’e fó responsabilidade ba ita atu tau ba debate, iha contexto parlamento sira-nian, questão essencial sira ba ita-nia Comunidade ne’e nia crescimento no afirmação, ne’ebé iha ligação ho interesses husi Povo sira iha país 8 ne’ebé ami representa.

Concretamente kona-ba Assembleia Parlamentar, V reunião ne’e nu’udar hakat ba oin ida tan iha processo afirmação órgão ne’e nian iha Comunidade.