Parlamentu Nasionál liu husi Grupu Mulheres Parlamentares Timor-Leste (GMPTL), iha loron 18 fulan outubru tinan 2024, organiza simultaneamente serimónia rua ba komemorasaun Loron Internasionál Feto Rural ho tema “Hakbi’it Ekonomia Feto Rurál kontribui ba sustentabilidade dezenvolvimentu lokál”, ne’ebé realiza iha Munisipiu Aileu ho Munisipiu Liquiçá-Maubara.
Loron Internasionál ba Feto Rurál selebra tinan-tinan iha loron 15 fulan Outubru. Data ida ne’e ho objetivu atu subliña importánsia feto sira nian iha komunidade rurál sira no sira-nia papél vital iha dezenvolvimentu agríkola no sosiál. Loron ida-ne'e mós buka atu halo vizivel kbiit transformadór feto sira-nian, inklui sira ne'ebé maka indígena no joven sira.
Partisipa iha serimonia ne’e, Deputada sira GMPTL, Reprezentante Deputadu balun, Sekretáriu-Jeral Adjuntu Parlamentu Nasionál ho nia komitiva, Prezidente Autoridade Munisipal ho nia estrutura sira inklui Komunidade sira. FIM
