Parlamentu Nasionál liu husi reuniaun plenária ordinária, iha loron 1 fulan outubru tinan 2024, hahu ho exekusaun Hino Nasionál, depois plenáriu kontinua halo diskusaun no votasaun ba Proposta Resoluzaun tolu mak hanesan:
Proposta Rezolusaun n.º 6/VI (1.ª) – Ratifika akordu entre Repúblika Demokrátika Timor-Leste ho Governu Sua Majestade e Sultão e Yang Di-Pertuan Brunei Darussalam, kona-ba Izensaun Vistu ba titular Passaporte Diplomatiku, Ofisial ka Servisu nian, ho 61 votus a favor 0 kontra no 0 abstensaun;
Proposta Rezolusaun n.º 7/VI (1.ª) – Ratifika akordu entre Repúblika Demokrátika Timor-Leste ho Reinu Tailandia nian kona-ba izensaun vistu turistiku ba titular Passaporte Komun, ho votus 61 a favor 0 kontra no 0 abstensaun;
Proposta Rezolusaun n.º 8/VI (1.ª) – Ratifika akordu entre Repúblika Demokrátika Timor-Leste ho Repúblika Singapura kona-ba izensaun vistu ba titular Passaporte Diplomatiku, Ofisial ka Servisu no ordinariu, ho 61 votus a favor 0 kontra no 0 abstensaun.
Antes halo aprovasaun ba projetu rezolusaun sira ne’e, Deputadu sira aprova voto pezar ba matebian ex-Deputadu Assembleia Konstituinte, Augusto da Conceição Amaral, nebe hakotu is iha loron 26 fulan stetembru tinan 2024, ho votus, 61 a favor, 0 kontra no 0 abstensaun. Alén de ne’e, Mesa hato’o mos informasaun husi Governu kona-ba retira Proposta Lei 8/VI(1.ª) – Kódigu Proriedade Industrial.
Iha sesaun plenária ne’e, Bankada Parlamentar FRETILIN hato’o deklarasaun polítika kona-ba sistema saúde pública iha nasaun Timor-Leste.
Iha intervensaun diversas, Deputadu sira aprezenta preokupasaun kona-ba, problema edukasaun, problema saúde, problema infraestrutura básica, problema uniforme PNTL no F-FDTL nian, problema lixo iha sidade Díli, no kestaun importante sira seluk ne’ebé precisa atensaun husi Governu.
Sesaun Plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Ministro Interior, Francisco da Costa Guterres, Vice-Ministra Asuntu ASEAN, Milena Maria da Costa Rangel no Sekretária Estadu Igualdade, Elvina de Sousa Carvalho, representa Vise-Ministru ba Asuntu Parlamentar. FIM
