Parlamentu Nasionál (PN), reprezenta husi Sekretariu-Jeral, Edgar Sequeira Martins, akompaña husi Sekretariu-Jeral Adjuntu, João Rui Amaral no dirijente sira husi Diresaun Rekursu Humanu, Gabinete Estudus no Assessoria Parlamentar no Divizaun Expediente no Arkivu, ofisialmente simu tékniku, Nuno Santos no Cristina Silva husi Assembleia Republika Portugal (ARP), iha loron 30 fulan setembru tinan 2024, iha sala Konferensia Parlamentu Nasionál.
Tekniku sira husi Assembleia Republika refere mai iha Parlamentu Nasionál atu apoiu servisu funsionariu sira iha área Rekursu Humanu, Arquivu no Biblioteka nian, nune mos, ho objetivu atu motiva no dezenvolve kapasidade funsionariu sira nian, tuir area tematika ne’ebé iha, hodi presta servisu ho professionalismo iha área refere, nune’e bele aumenta produtividade no kualidade servisu Parlamentu Nasional nian tuir nesesidade atual no futuru nian.
Asaun sira ne’e realiza liu husi Programa kooperasaun bilateral entre Assembleia Repúblika Portugal ho Parlamentu Nasional Timor-Leste nian, ba asaun rua mak hanesan, apoiu estabelesimentu programa jestaun dezenvolvimentu Rekursus Humanus asaun n.º 14 no avaliasaun ba funsionamentu arkivu no biblioteka Parlamentu Nasionál nian asaun n.º 22.
Tuir ajenda, asaun rua ne’e sei realiza durante semana ida, husi loron 30 fulan setembru to’o 4 fulan outobru tinan 2024, iha Parlamentu Nasional.
Partisipa iha sesaun ne’e, Diretora Rekursus Humanus, Lizia Carla de Araújo, Diretora Gabinete Estudu no Assessoria Parlamentar, Casilda Ilda Afonso, Chefe Divizaun Jestaun Administrativa Rekursus Humanus, Marta Corte-Real, Chefe Centru Formasaun, Jaimito Ribeiro, Chefe Divizaun Dezenvolvimentu Rekursus Humanus, Eduardo Corte-Real, Chefe Biblioteka, Celia da Cruz no Chefe Divizaun Expediente no Arkivu, Ligia Maria Lobato. FIM
