Assembleia União Interparlamentar nian ba dala 129 hala’o iha Genebra, iha 17 to’o 20 março. Deputados David “Mandati” Ximenes (presidente), Brígida Correia (secretária), Aniceto Guterres, Izilda Soares, Maria Angélica R. da C. dos Reis ho Anselmo da Conceição maka hola parte.
Secretário-Geral do Parlamento Nacional mós bá hotu iha comitiva no participa iha reunião hussi Secretário-Geral sira UIP nian.
Durante Assembleia ne’e mossu decisão oioin no ita destaca sira tuirmai ne’e:
- Comissão de Paz Internacional e Segurança aprova Resolução ida kona-ba “La’o ba oin hodi halo mundo livre hussi arma nuclear sira: Parlamento sira-nia contribuição"
- Comissão de Desenvolvimento Sustentável, Finanças e Comércio aprova Resolução ida kona-ba “Ba desenvolvimento ne'ebé bele resiste hassoru risco: Hola iha consideração evolução demográfica ho limitações naturais”.
- Comissão de Democracia e Direitos Humanos aprova Resolução ida kona-ba “Parlamento sira-nia papel iha defesa ba labarik nia direitos, liuliu labarik migrante la acompanhada, no iha prevenção ba sira-nia exploração, iha situação conflito armado”.
- Ponto de emergência ida mós hetan aprovação: “Ajuda restaura paz no segurança no hametin democracia iha República Centro-Africana: UIP nia contribuição”.
Durante Assembleia ne’e mós hala'o eleição ba Secretário-Geral foun UIP nian, ne’ebé Sr. Martin Chungong (Camarões) eleito ho voto 199, contra voto 79 ba Sra. Shazia Rafi (Paquistão) no voto 74 ba Sr. Geert Versnick (Bélgica).
