Parlamentu Nasionál realiza atividade 3ª edição Parlamento Jovem tinan ida ne’e ho tema ba debate “Os Jovens e as Tecnologias de Informação e Comunicação” destinadu ba Estudante husi Eskola Ensinu Sekundáriu iha sidade Díli: Atividade ida ne’e realiza iha Parlamentu Nasionál, iha loron 22 to’o 23 fulan agostu tinan 2024.
Objetivu husi atividade ida ne’e, atu incentiva interesse jovem sira nian ba partisipasaun sívika no polítika no koñese signifikadu husi mandatu parlamentar no processo desizaun sira iha Parlamentu Nasionál no mos incentiva kapasidade hodi argumenta no defeza ba ideias ho respeitu ba dignidade humanu. Tanba ne’e, ida ne’e sai hanesan loron espesial ba Deputadu Estudante sira hodi assume profisaun hanesan Deputadu iha Parlamentu Nasionál durante loron rua nia laran
Iha loron 22 fulan agustu, atividade konsentra ba diskusaun no aprovasaun iha jeneralidade no especialidade ba projetu rekomendasaun sira ne’ebé aprezenta husi Deputadu Estudante reprezentante husi Eskola Ensinu Sekundáriu Díli laran hamutuk 13, ne’ebé fahe ba komisaun 3, no kada Komisaun iha Deputadu Estudante hamutuk 13. Komisaun 1 no komisaun 3 lidera husi Sr. Deputadu António Verdial de Sousa Gama, no Komisaun 2 lidera husi Sra. Deputada Cedelizia Faria dos Santos. Kada komisaun hetan apoiu husi Tekniku Parlamentu Nasionál nian. Antes halo diskusaun ne’e, sira mos halo eleisaun ba Membru da Mesa komisaun nian.
Iha loron 23 fulan agostu, hahu abertura diskusaun iha Sala Plenária ne’ebé preside husi Sr. Deputadu António Verdial de Sousa Gama, reprezenta Prezidente Parlamentu Nasionál, hahu ho exekusaun Hino Nasional, depois de ne’e, Deputado estudante halo eleisaun ba Membru Mesa Plenária Parlamentu Jovem nian mak hanesan Presidente Parlamentu, Wilson J.I. Amaral, husi Eskola Sekundária Geral Externa São José, hanesan Vice-Presidente, Pureza Gracia Fatima da Silva Fernandes, husi Eskola Sekundária Jeral Públika 12 de Novembro, hanesan Secretária, Verónica Rica Borges da Cruz, husi Eskola Sekundária Jeral Públika 12 de Novembro no hanesan Vice-Secretária, Alexandrina S. Soares, husi Eskola Sekundária Jeral Nikolau Lobato.
Tuir mai, Deputadu estudante sira hato’o perguntas relasiona ho funsaun Parlamentu Nasionál tuir konstituisaun haruka, ne’ebé hetan ona aprovasaun iha komisaun idak-idak ba Deputadu Parlamentu Nasionál. Iha parte lokraik, plenária retoma hikas nia servisu ho aprezentasaun no aprovasaun ba Projetu Rekomendasaun sira ne’ebé aprova ona iha kada Komisaun. Depois de ne’e, kontinua ho aprezentasaun no diskusaun ba quinze medidas proposta husi komisaun sira (kada komisaun 5 medidas), no ikus, hili medidas sanulu ne’ebé integra ba rekomendasaun Parlamentu jovem nian ba Parlamentu Nasionál.
Termina prosesu ba votasaun ba medida sira, prosede ba aprovasaun no votasaun iha final global, ba Rekomendasaun husi Parlamentu jovem ba parlamentu Nasionál ba edisaun 2024 nian, rekomedasaun ida ne’e mak entrega ba Deputadu António Verdial de Sousa Gama, reprezenta Presidente Parlamentu Nasionál.
Sesaun ida ne’e hakotu ho entrega sertifikadu partisipasaun ba Deputadu estudante sira Parlamentu jovem 3ª edisaun.
Partisipa iha atividade ida ne’e, kada eskola ema nain tolu akompaña ho professor ida, mak hanesan: Estudante Deputadu Parlamentu Jovem husi ESGP 12 de Novembro; ESGP 4 de Setembro; ESGP 5 de Maio; ESGP FINANTIL; ESGP 10 de Dezembro; ESG Nicolau Lobato; Externato São José; ES Paroquial de São Pedro; ES Sta. Madalena de Canossa; ESTV-IT 28 de Novembro; ESTV-EEC de Becora; ESTV-ETI de Díli e ESTV-GTI de Becora.
