Sekretáriu-Jerál Parlamentu Nasionál, Edgar Sequeira Martins, akompaña husi Diretora Rekursu Humanu no Xefe Divizaun Sentru Formasaun, halo abertura ba formasaun ba funsionariu sira Parlamentu Nasionál nian, iha loron 19 fulan agosto tinan 2024, iha Munisipiu Aileu.
Iha discurso abertura ne’ebe ho prezensa mós Reitor Instituto Superior Cristal ne’e, Sekretáriu-Jerál husu ba funsionariu sira atu konsentra no aprende matéria no esperensia sira hodi fasilita servisu lorloron.
Ba jornalista sira hafoin abertura, Sekretáriu Jerál hatete Sekretáriadu Jerál Parlamentu Nasionál aproveita tempu resesu ne’e hodi halo kapasitasaun ba funsionariu sira husi área oioin tuir prioridade ne’ebe mak iha. Hanesan formasaun ne’ebe lao dadaun konsentra ba área aprovizionamentu liuliu kona-ba kontratasaun publika atu tekniku sira iha koñesimentu nato’on iha funsionamentu lorloron nian.
Formasaun refere fahe ba grupo rua, grupu primeiro hahu iha loron 19 too 23 fulan agosto no sei kontinua ba grupo tuir mai iha loron 26 too 30 fulan agosto. FIM
