Iha 16 de abril, deputado português Helder Amaral, hussi Assembleia da República de Portugal e membro hussi ninia Comissão Eventual kona-ba Parceria Público-Privada (PPP) sira, ne’ebé hetan convite hussi Comissões de Finanças Públicas (Comissão C), Economia e Desenvolvimento (Comissão D) e Infraestruturas, Transportes e Comunicações (Comissão E) hato’o conferência ida, iha Parlamento Nacional, kona-ba experiência portuguesa ho forma financiamento ida-ne’e ba projeto desenvolvimento boboot sira no oinssá maka Parlamento Nacional bele acompanha execução ba sira-nia contrato respetivo.
Conferência ne’e, hamutuk ho seminário ne’ebé Comissão hirak-ne’e organiza daudaun kona-ba PPP, hola parte iha programa preparação deputados Parlamento Nacional de Timor-Leste nian atu acompanha implementação ba projeto boot rua ne’ebé sei hala’o iha ita-nia país no sei hetan financiamento liuhossi acordo entre Estado ho financiador privado sira: Porto iha Tibar no modernização Aeroporto Internacional Presidente Nicolau Lobato.
Conferência ne’e hetan participação maka’as hussi deputado timoroan sira no fó biban ba sira atu hatene buat essencial kona-ba características hussi projeto sira ho tipo hanessan ne’e no mós aprende ho experiência Portugal nian. Comissão de Economia e Desenvolvimento nia Presidente, Deputada Jacinta Abucau Pereira, ne’ebé preside ba Conferência, agradece Deputado Helder Amaral nia disponibilidade atu ko’alia ho colega timoroan sira no sublinha importância hussi conferência ne’e ba sira atu bele hala’o sira-nia knaar didi’ak.
Seminário ne’ebé temi, ne’ebé hala’o ho apoio financeiro hussi projeto PNUD hodi tulun hametin funcionamento Parlamento Nacional nian, sei hetan presença hussi diretor hussi entidade responsável ba PPP Portugal nian no diretor ida hussi entidade correspondente iha Filipinas. Seminário ne’e, ba deputado timoroan sira de’it, sei hala’o iha 7-8 maio iha Baucau, tanba Parlamento Nacional considera importante atu descentraliza iniciativa sira hanessan ne’e.
