Parlamentu Nasionál liu husi Sekretáriadu Jerál, ensera atividade formasaun ne’ebe organiza husi Diresaun Rekursu Umanu durante semana ida iha City8 Díli, kona-ba Jestaun Finansas Públikas, analiza setorial ba Orsamentu Jerál Estadu, elaborasaun proposta alterasaun, tramitasaun no prosedimentu kona-ba Orsamentu Jerál Estadu.
Sekretáriu-Jerál Adjunto Parlamentu Nasionál, João Rui Amaral, iha enseramentu ba formasaun ne’e iha loron 26 fulan jullu tinan 2024, hatete hanesan asesor nasionál no tekniku Parlamentu Nasionál importante tebes atu entende prosesu no tramitasaun sistema orsamental ho nia elaborasaun proposta sira hodi apoiu di’ak liutan Deputadu sira.
Tanba ne’e ho konteúdu matéria sira ne’ebe fornese husi formador sira hanesan Dra. Natália Bere, Dra. Margarida Inácio no Dr. Leonel Inácio ne’e importante no presija implementa iha servisu loroloron, liuliu iha período orsamental.
Durante formasaun, formador sira halo mós avaliasaun no teste ba partisipante sira kona-ba matéria ne’ebe sira aprende durante semana ida. FIM
