Parlamentu Nasionál, liu husi Komisaun Permanente halao reuniaun dahuluk nian, iha loron 16 fulan jullu tinan 2024 hodi eleze Sekretaria no Vise-Sekretaria ba Meza Komisaun Permanente nian, ho votus 16 a favor 0 kontra no 0 abstensaun.
Eleisaun ne’e halo ho konsensus entre Representante kada Bankada Parlamentante iha Komisaun Permanente sira atu mantein Sekretaria ho nia Vise-Sekretaria Parlamentu Nasional ho sira nia suplente sira ba Meza Komisaun Permanente nian.
Eleisaun ne’e mos ho konsesus tuir rejimentu Parlamentu Nasionál haruka katak sei realiza reuniaun plenária iha loron kuarta kada semana inklui mos reuniaun extraordinária ruma ba asuntu importante sira liu husi Konvokatoriu Prezidente Parlamentu nian ba Lideres Bankadas hodi resposta ba asuntu importante sira ne’e to resesu Deputadu sira nia remata iha loron 15 setembru tinan 2024.
Hafoin eleisaun ida ne’e, Meza kontinua ajenda ba intervensaun diversas husi Deputadu sira. Nune’e iha intervensaun diversas ne’e, Deputadu sira kontinua hato’o ba Governu liu husi ministériu relevante sira atu hadiak estrada sira iha munisipiu, rezolve problema professores kontratadu ho dignu tuir direitu humanu ho problema inviksaun sira ne’ebe mak komunidade sira hetan afetado até agora seidauk simu osan kompensaun husi Governo inklui asuntu importante sira seluk.
Reuniaun ne’e prezide husi Prezidente Parlamentu Nasional, Maria Fernanda Lay akompaña husi membro Meza sira, no hetan prezensa husi Vise- Ministru ba Asuntu Parlamentar, Aderito Hugo da Costa. FIM
