Parlamentu Nasionál liu husi Komisaun D ne’ebe trata asuntu Ekonomia no Dezenvolvimentu hala’o atividade fisklalizasaun iha Munisipiu Ainaro, iha loron 11 fulan jullu tinan 2024.
Atividade fiskalizasaun ne’ebe lidera husi Prezidente Komisaun D, Deputadu Ricardo Baptista no akompaña husi membru komisaun ne’e hahú ho reuniaun ho autoridade lokal no diretor sira servisu munisipal nian liga ba área, Agrikultura, Kooperativa, Ambiente, no área relevante sira seluk hodi hetan informasaun no relatóriu servisu kona-ba ezekusaun orsamentu no programa 2023 no 2024, inklui dezafiu no progresu sira ne’ebe iha, nune’e Komisaun D bele halo rekomendasaun ba Governu hodi melhoria iha tinan tuir mai, tuir papel Deputadu sira nian.
Hafoin reuniaun, ekipa Komisaun D, kontinua halo fiskalizasaun iha terenu hodi hare diretamente situasaun real ne’ebe enfrenta husi komunidade sira hanesan, atividade kooperativa sira, irigasuan iha Ainaro Vila, Maununu, Hatudu no Kasa.
Iha oportunidade ne’e, alem de ko’alia kona-ba área tematika komisaun nian, Xefe Suku Maununu, mós reprezenta nia komunidade hodi hato’o preokupasaun liga ba irigasaun ne’ebe aat, falta ekipamentu no pessoal saúde ho profesor sira iha Suku Maununu. Tanba ne’e rekomenda ba Deputadu sira bele hato’o preokupasaun sira ne’e ba Governu hodi rezolve. FIM
