Komisaun E iha Parlamentu Nasionál ne’ebe trata asuntu Infraestrutura, halo atividade konsultasaun publika ba Proposta Lei numeru 9/VI(1ª) – Medidas de Tutela da Legalidade Urbanistica, iha Munisipiu Ermera, iha loron 11 fulan jullu tinan 2024.
Iha abertura ba konsultasaun publika ne’e, Prezidente Komisaun E, Deputadu Marcos Xavier, hatete objetivu husi konsultasaun ne’e atu rona opiniaun sira husi autoridade hotu-hotu iha munisipiu nian inklui sosiedade sivil, akademiku, igreja no seluktan kona-ba proposta lei refere, nune’e bele konsidera iha faze diskusaun jeneralidade no espesialidade ba proposta lei refere.
Prezidente Komisaun E ne’e hatutan katak hafoin halo konsultasaun iha munisipiu sira inklui RAEAO no Atauru, Komisaun E sei konvida entidade kompetente liliu Governu hodi halo audiénsia antes halo diskusaun iha jeneralidade.
Proposta lei ne’e importante tebes atu Governu bele utiliza hodi halo politika urbanizasaun ne’ebe diak no povu hotu bele sente pertense no patisipa iha prosesu dezenvolvimentu.
Prezidente Autoridade Munisípiu Ermera, José Martinho dos Santos Soares, hatete autoridade munisipal apresia ho atividade konsultasaun refere tanba povu hotu liuliu autoridade lokal sira bele partisipa direta iha prosesu diskusaun no fó opiniaun liga ba proposta lei refere.
Durante konsultasaun, autoridade lokal, reprezentante veteranu, akademiku, sosiedade sivil, no juventude sira aprezenta preokupasaun, opiniaun no sujestaun sira liga ba proposta lei ne’e atu Deputadu sira bele konsidera iha faze diskusaun jeneralidade no espesialidade.
Iha faze konsultasaun ne’e mós, asesor Komisaun E halo mós aprezentasaun kona-ba proposta lei ne’e ho nia konteudu jurídika ho nia politika implementasaun bainhira proposta lei refere aprovado. FIM
