Parlamentu Nasionál liu husi reuniaun plenaria ordinária, iha loron 8 fulan jullu tinan 2024, aprova ona dezlokasaun Prezidente Repúblika ba Repúblika Xina no Republika Sosialista Vietname iha loron 27 fulan jullu no loron 4 fulan agostu tinan 2024, ho votus 36 a favor, 1 kontra no 4 abstensaun.
Tuir pedidu ne’ebe gabinete Prezidente Repúblika envia ba Parlamentu Nasionál katak vizita estadu ne’e halo bazeia ba konvite husi nasaun rua ne’e tuir data ne’ebe mak iha.
Iha período antes ordem do dia nian, Meza halo anúnsiu ba submisaun membru Komisaun Permanente sira durante tempo resesu parlamentar.
Membru Deputadu sira ne’ebe envolve iha lista Komisaun Permanente tuir proposionalidade bankada parlamentar sira nian, hanesan Bankada CNRT iha membru efetivu 6 ho nia suplente, Bankada FRETILIN iha membru efetivu nain 4 ho nia suplente, Bankada PD nain 1 ho nia suplente, Bankada KHUNTO nain 1 ho nia suplente no Bankada PLP nia membru nain 1 ho nia suplente.
Meza mós halo anunsiu kona-ba relatoriu fiskalizasaun Komisaun F nian, ne’ebe trata asuntu Saude, Seguransa Sosial no Igualdade Jeneru, iha munisipiu Manatuto no RAEOA, inklui komisaun nia partisipasaun iha Konferensia Munispal iha Munisipiu Baukau liga ba Lei Protesaun, Labarik no Joven iha Timor-Leste.
Iha sesaun plenaria ne’e mós bankada parlamentar sira aprezenta deklarasaun politika ne’ebe koalia kona-ba tinan ida governasaun IX Governu Konstitusional no lejislativa dahuluk hodi halo reflesaun ba dezenvolvimentu ne’ebe atinji ona ho nia difikuldade sira.
Deklarasaun politika sira ne’e mós kontinua ejiji ba Governu atu fó atensaun maximu ba setor importante sira hanesan saude, edukasaun no agrikultura hodi lori dezenvolvimentu ba povu no nasaun.
Deklarasaun politika sira ne’e hetan apoiu husi Deputadu sira liu husi intervensaun diversa ne’ebe kontinua husu ba orgaun ezekutivu atu implementa no halao prosesu dezenvolvimentu tuir planu no programa ne’ebe aprovadu ona.
Entretantu iha período ordem do dia, Deputadu sira halo diskusaun no votasaun ba Proposta Rezolusaun Nu. 4/VI (1a) - Ratifika Akordu entre Repúblika Demokratika Timor-Leste (RDTL) no Ajensia Internasionál ba Enerjia Atomika ba Aplikasaun Salvaguarda iha Ambitu Tratadu Não- Proliferasaun, ho votus 59 a favor, 0 abstensaun no 0 kontra.
Ratifikasaun ne’e ho objetivu atu asegura Estadu ho Lejitimidade Politika no Enkuadramentu Juridiku iha Esterna no Interna, tamba Timor-Leste hola parte ona iha membru internasional, prinsipalmente liga ba Adezaun ASEAN nian, tamba ne’e importante tebes atu Timor-Leste bele ratifika Rezolusaun ida-ne’e hodi bele salva guarda Estadu tuir prosesu legal hotu ne’ebe iha.
Reuniaun plenaria ne’e prezide husi Prezidente Parlamentu Nasionál, Maria Fernanda Lay, akompaña husi Membru Meza sira no hetan partisipasaun husi, Ministru Justisa, Sergio de Jesus da Costa Hornai, Vise-Ministru ba Asuntu Parlamentar, Aderito Hugo da Costa no Vise-Ministra ba Asuntu ASEAN, Milena Maria da Costa Rangel. FIM
