Parlamentu Nasionál liu husi Komisaun D ne’ebe trata asuntu Ekonomia no Dezenvolvimentu, iha loron 4 fulan jullu tinan 2024, halo atividade fiskalizasaun iha munisipiu Bobonaro.
Atividade fiskalizasaun ne’ebe lidera husi Prezidente Komisaun D, Deputadu Ricardo Baptista, ne’e hahú reuniaun ho autoridade munisipal inklui entidade relevante sira atu hatene prosesu dezenvolvimentu ho ezekusaun orsamentu tuir planu no programa ne’ebe aprovadu.
Iha opotunidade ne’e, diretor setorial sira hanesan Agrikultura, Komersiu no Industria, Kooperativa, SEPFOPE no seluk tan, aprezenta servisu ho nia desafiu sira no planu asaun ba tinan oin atu Deputadu sira bele konsidera.
Hafoin reuniaun, Deputadu sira Komisaun D, akompaña husi autoridade sira halo vizita fiskalizasaun ba edifisiu Agrikultura Munisipal, Irigasaun Maliana I no II, Merkadu foun munisipal nian, Karantina animal no Merkadu iha Motain, Plantasaun ba Reflorestasaun Ai-kameli iha Manduki inklui peskador iha Atabae. FIM
