Prezidente Parlamentu Nasionál, Maria Fernanda Lay, akompaña husi Prezidente Komisaun F, Deputada Maria Gorumali Barreto, Prezidente Komisaun G, Deputadu Armando dos Santos no Deputadu sira seluk, simu delegasaun husi Parlamentu Reinu Tailandia ne’ebe xefia husi Senador Jeral Boonsrang Niumpradit, iha loron 26 fulan juñu tinan 2024, iha sala konferensia Parlamentu Nasionál nian.
Durante vizita ne’e, parte rua koalia liu kona-ba área hirak ne’ebe importante atu dezenvolve liu husi kooperasaun parlamentu rai rua nian, liu husi grupo amizade sira.
Delegasaun ne’e mós partilla informasaun sira, nesesidade sira liga ba atividade parlamentar inklui área kooperasaun balun ne’ebe ho apoiu governu nian liu husi setor importante sira hanesan agricultura, peska no seluk tan hodi reforsa ekonomia rai laran.
Prezidente Parlamentu Nasionál apresia vizita delegasaun ne’e atu bele partilla informasaun sira liga ba atividade no nesesidade nasaun nian oinsa bele kontribui ba dezenvolvimentu nasaun nian.
Iha reuniaun ne’e mós delegasaun sira konkorda atu kontinua iha vizita entre parlamentu hodi diskute no realiza kooperasaun sira iha área importante sira. FIM
