Parlamentu Nasionál liu husi reuniaun plenária ordinária, iha loron 11 fulan juñu tinan 2024 , aprova ona iha Final Global ba Projetu Lei Nu. 7/VI (1a) – kona-ba Presedensia no Protokolu Estadu nian ho 59 votu a favor, 0 kontra no 0 abstensaun.
Lei kona-ba Presendensia no Protokolu Estadu ne’e atu guia no fasilita orgaun Estadu sira iha atividade ka serimonia ofisial sira liga ba entidade sira estadu nian ho nia pratika tuir lei.
Iha sesaun plenaria ne’e, Bankada Parlamentar FRETILIN aprezenta nia deklarasaun politika ne’ebe ko’alia kona-ba violensia ne’ebe akontese iha Portugal, ne’ebe komete husi timoroan sira. Ba asuntu ne’e Bankada FRETILIN husu ba Governu atu koordena no buka solusaun ba problema refere.
Entretantu iha intervensaun Deputadu sira nian, maioria Deputadu sira husu atu Governu fó atensaun serio ba problema hirak ne’ebe akontese iha rai laran no estranjeiru ne’ebe envolve husi timoroan. Traballador timoroan iha rai-liur ne’ebe dalaruma la hetan tratamentu dignu inklui asuntu importante sira seluk.
Reuniaun plenaria ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Ministru Negosiu Estranjeiru no Kooperasaun, Bendito dos Santos Freitas no Vise- Ministru ba Asuntu Parlamentar, Aderito Hugo da Costa. FIM
