Parlamentu Nasionál iha loron 10 fulan juñu tinan 2024, hala’o debate ho Governu liu husi Ministeriu Obras Publikas, kona-ba setor Eletrisidade.
Iha debate ne’ebe prezide husi Vise-Prezidente Parlamentu Nasionál, Maria Terezinha Viegas, ne’e hahú ho aprezentasaun kona-ba situasaun jeral eletrisidade nian iha Timor-Leste tomak, husi Ministru Obras Publikas, Samuel Marçal, no kontinua kedas ba leitura relatório husi Komisaun C.
Hafoin ida-ne’e, Deputadu sira aprezenta preokupasaun barak kona-ba eletrisidade iha timor laran tomak, liuliu área hirak hirak ne’ebe seidauk kobre, oinsa Governu bele rezolve.
Entreantu iha período de antes ordem do dia nian ne’ebe prezide husi Prezidente Parlamentu Nasionál, Maria Fernanda Lay, halo aprovasaun ba Proposta Rezolusaun numeru 2/VI (1ª) – Ratifica, para Adesão, a Convenção para a Solução Pacifica dos Conflitos Internacionais, Concluída na Haia, em 18 de outubro de 1907, ho 62 votu a favor, 0 kontra no 0 abstensaun.
Nune’e mós bankada parlamentar FRETILIN ho KHUNTO aprezenta deklarasaun politika ne’ebe Bankada FRETILIN ko’alia kona-ba dezenvolvimentu setor privadu liga ba kondisaun ne’ebe Governu kria, no Bankada KHUNTO ko’alia kona-ba kondisaun infraestrutura hafoin inundasaun ne’ebe akontese iha Munisipiu Covalima foin lalais ne’e atu Governu bele buka solusaun lalais.
Iha intervenção Deputadu sira nian, kontinua sujere ba Governu atu buka solusaun ba asuntu edukasaun no saúde ne’ebe hamosu preokupasaun iha publiku, rezolve asuntu infraestrutura bazika iha munisipiu sira inklui asuntu importante sira seluk. FIM
