Pagina Inicial»Noticia
Parlamentu Nasional liu husi Komisaun A ne’ebe trata asuntu Konstitusionál no Justisa halo atividade fiskalizasaun iha Suku Makadade Munisipiu Ataúro, iha loron 16 too 17fulan maiu tinan 2024.
Atividade fiskalizasaun ne’ebe lidera husi Vise-Prezidente Komisaun A, Deputadu António Verdial de Sousa akompaña husi membru komisaun sira ne’e ho objetivu atu rona preokupasaun komunidade sira nian liuliu hirak ne’ebe afetadu ba projetu eletrifikasaun iha area refere.
Iha fiskalizasaun refere, komunidade sira ejiji direitu kompensasaun ba empreza tuir lei ne’ebe vigoria, nune’e la sente sai vitima ba prosesu dezenvolvimentu.
Ba asuntu ne’e, Deputadu sira Komisaun A sei aprezenta preokupasaun sira ba Governu liuliu ministeriu relevante hodi responde.
Durante atividade fiskalizasaun, Prezidente Autoridade Atauro, Mateus Belo ho Xefe Suku Makadade aprezenta ba Deputadu sira kona-ba preokupasaun infraestrutura bazika inklui asuntu importante sira seluk hodi Governu bele rezolve tuir prioridade ne’ebe mak iha. FIM
