Parlamentu Nasionál liu husi sesaun plenária iha loron 29 fulan abril tinan 2024, aprova ona iha jeneralidade ba Proposta Lei numeru 7/VI(1ª) – alterasaun datoluk ba Lei numeru 3/2006, loron 12 fulan abril kona-ba Estatutu Kombatente Libertasaun Nasionál, ho votu 39 a favor, 0 kontra no 19 abstensaun.
Alterasaun ne’e halo ho objetivu atu rekoñese ema hotu nia partisipasaun iha luta libertasaun nasionál husi inisiu luta too konsulta popular ne’ebe povu partisipa hodi fó vitoria ba povu no nasaun.
Iha período de antes da ordem do dia nian, Bankada Parlamentar sira aprezenta deklarasaun politika, ne’ebe Bankada FRETILIN ko’alia kona-ba sistema saúde publika ne’ebe konsidera la iha mudansa no afeta ba pasiente sira. Bankada KHUNTO ko’alia kona-ba eviksaun iha kapital Díli ne’ebe hamosu preokupasaun iha publiku, no Bankada PLP ko’alia kona-ba investimento no dezenvolvimentu setor ekonomia liga ba ekonomia populasaun nian ne’ebe konsidera sentru ba dezenvolvimentu.
Entretantu iha intervensaun diversa, Deputadu sira kontinua aprezenta preokupasaun komunidade sira nian liuliu liga ba infraestrutura, saúde, edukasaun, ekonomia inklui situasaun kona-ba eviksaun iha Kapital Díli.
Sesaun plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Ministru ba Asuntu Kombatente ba Libertasaun Nasionál, Gil da Costa Monteiro “Oan Soru” no Vise Ministru ba Asuntu Parlamentares, Adérito Hugo da Costa. FIM
