Pagina Inicial»Noticia
Parlamentu Nasionál liu husi, sesaun plenária ordinária iha loron 8 fulan abril tinan 2024, fo autorizasaun ba dezlokasaun Prezidente Repúblika, José Manuel Ramos Horta, atu halo vizita Estadu ba Portugal iha loron 20 too 28 fulan abril tinan 2024, ho 42 votus a favor, 1 kontra no 6 abstensaun.
Vizita Estadu ne’e halo hodi responde ba konvite husi Prezidente Repúblika Portugal nian atu partisipa iha aniversariu ba dala 50º, loron 25 de abril (Revolução dos Cravos) iha Lisboa no sai mós orador ba serimonia graduasaun iha Universidade New Jersey, iha Estadu Unidus Amerika.
Reuniaun plenaria ne’ebe hahú ho ezekusaun Hino Nasionál ne’e, kontinua kedas ba deklarasaun bankada parlamentar sira hanesan; Bankada FRETILIN ne’ebe koalia kona-ba intervensaun governu sentral ba servisu autoridade lokal no Bankada PD koalia kona-ba valor sosiedade nian ba kontribuisaun dezenvolvimentu nasionál. Enretantu Bankada KHUNTO hatoo deklarasaun kona-ba problema saude, edukasaun inklui setor importante sira atu governu bele rezolve ho lalais.
Entertanto iha intervensaun diversas nian, Deputadu sira aprezenta kestaun kona-ba estrada, ponte no irigasaun ne’ebe maka aat ona iha munisipiu sira atu governu bele hadia no fasilita komunidade sira, prosesu rekrutamentu ba professor sira, pesoal saude no seluk tan.
Reuniaun plenaria ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Vise-Ministru ba Asuntu Parlamentar, Aderito Hugo da Costa. FIM
