Pagina Inicial»Noticia
Prezidente Parlamentu Nasionál, Maria Fernanda Lay, akompaña husi membru Meza sira no Deputadu sira Komisaun A, simu audiénsia husi ekipa reforma setor justisa ne’ebe lidera husi Lucia Lobato, iha loron 20 fulan fevereiru tinan 2024, iha sala konferensia Parlamentu Nasionál nian.
Iha introdusaun, Koordenador Ekipa Reforma Setor Justisa, Lucia Lobato hatete objetivu husi audiénsia refere atu rona opiniaun no sujestaun husi Parlamentu Nasionál liuliu Prezidente Parlamentu Nasional, Komisaun A no Deputadu sira kona-ba reforma setor justisa.
Ekipa reforma setor justisa rona ona entidade oioin liga ba setor justisa nuné bele reformula opiniaun sira hodi hamosu dokumentu ida ba reforma setor justisa iha futuru mai.
Durante audiénsia, Prezidente Parlamentu Nasionál ho Deputadu sira Komisaun A nian fó sujestaun no opiniaun ba ekipa sira hodi konsidera iha prosesu reforma justisa.
Komisaun A mós sujere atu ekipa reforma setor justisa aprezenta proposta konkreta ruma atu Deputadu sira bele analiza no diskute tuir realidade ne’ebe povu enfrenta.
Iha loron hanesan, Prezidente Parlamentu Nasionál mós simu audiénsia husi reprezentante espesial Embaixadóra Georgia no Embaixadór Africa do Sul, iha sala konferensia parlamentu nian. FIM
