Pagina Inicial»Noticia
Prezidente Parlamentu Nasionál, Maria Fernanda Lay, akompaña ho nia Vise-Prezidente na’in rua halo simu audiénsia husi reprezentante UNFPA iha Timor-Leste, Pressia Arifin-Cabo ho nia ekipa, iha loron 27 fulan jullu tinan 2023, iha Gabinete Prezidente nian.
Durante audiénsia ko’alia liu kona-ba saúde labarik sira no inan isin rua sira iha Timor-Leste, tanba tuir dadus ne’ebé mak iha hatudu isin rua barak iha risku ba moras oioin no afeta ba oan sira. Tuir dadus, inan isin rua 57% mak asesu ba fasilidade saúde no 43% la asesu ba fasilidade saúde liuliu sentru saúde sira. Tanba ne’e ho audiénsia refere fó hanoin ba Parlamentu Nasionál atu fó atensaun masimu ba parte saúde liuliu iha diskusaun orsamentu.
Iha loron hanesan, Prezidente Parlamentu Nasionál akompaña husi nia Vise-Prezidente na’in rua kontinua halo reuniaun ho responsavel East Timor Trading, Samitha Aluwihare hodi ko’alia kona-ba servisu sira ne’ebé durante ne’e East Timor Trading halo liuliu iha parte empregu no atendementu ka hospitalidade nian.
Husi knaar sira East Timor Trading nian, kompromete kontinua iha futuru hodi kontribui ba dezenvolvimentu nasionál. FIM
