Iha loron sexta-feira 10 fulan julho tinan 2015, iha sala konferensia Parlamentu Nasional hala’o serimónia despedida entre UNDP no Parlamentu Nasional ne’ebé durante ne’e serbisu hamutuk hahú hussi tinan 2011 too 2015. Partisipa iha serimónia ne’e mak Prezidente Parlamentu Nasional Dr. Vicente Guterres, Embaixadora Uniaun Europeia, Sylvie Tabesse, Ordenadora husi Ministeriu Negosios Estrangeiros, Sra. Madalena Hanjam Costa Soares. Reprezentante Rezidente UNDP, Knut Ostby. Chefe Unidade de Análise ba Programa Governação, Sr. João Pereira no Representante husi deputadu sira mak Sra.Deputada Maria Fernanda Lay no Sra. Deputada Domingas A. da Silva Bilou-Mali.
UNDP organiza programa enkontru ne’e ho objetivu atu hato’o relatoriu serbisu hamutuk ho Parlamentu Nasional durante tinan 5 nia laran, hodi suporta atividade ne’ebé mak lao iha Parlamentu laran. Enkontru ne’e mós hanesan ba dala ikus, hodi taka projetu UNDP ba Parlamentu Nacional, maibé UNDP mós husu ba Parlamentu Nasional atu kolabora nafatin ho UNDP hodi suporta iha parte ne’ebé mak sai hanesan difikuldade ba Parlamentu Nasional iha futuru.
Iha serimónia ne’e Prezidente Parlamentu Nasional ko’alia kona-ba servisu UNDP nian ne’ebé mak remata ona, maibé Parlamentu Nasional mós sei presiza nafatin doador sira atu suporta nafatin Parlamentu Nasional iha atividade ne’ebé mak too agora sei sai difikuldade ba deputado sira e funcionário sira iha Parlamentu Nacional.
Iha tinan 2013 too agora rezultadu ne’ebé mak atinji pozitivu tebes ne’e duni agradese tebes doador sira nia apoiu hodi nune’e bele fó nafatin ajuda ba iha Parlamentu Nasional.
Difikuldade ne’ebé funsionáriu sira hasoru durante ne’e mak hanesan língua portuguêsa, maibé neineik ba neineik ita-nia funsionáriu sira sei domina língua portuguêsa. Nune’e iha área oioin mak presiza nafatin apoiu hussi UNDP, liuliu iha área jurídica nian.
Entretanto reprezentante rezidente UNDP Knut Ostby iha nia intervensaun hatete UNDP sente kontenti ba rezultadu pozitivu ne’ebé Parlamentu Nasional hetan hahú tinan 2011 too agora. No husi komunidade internasional senti orgulhu tebes ho projetu ne’ebé mak implementa iha Parlamentu Nasional no prontu atu suporta nafatin Parlamentu Nasional iha futuru oin mai.
Projetu UNDP ne’e tuir loloos taka tiha ona iha fulan dezembru 2014, maibé tanba iha programa balun ne’ebé seidauk implementa nune’e prolonga tempu ne’e hodi kontinua too fulan junho 2015.
Embaixadora Uniaun Europeia, Sylvie Tabesse mós informa katak, UNDP ho Uniaun Europeia sei nakloke ba instituisaun rua ne’e Governu no Parlamentu Nasional hodi kontinua suporta nafatin atividade ne’ebé mak sei sai hanesan difikuldade ba instituisaun rua ne’e.
Daudaun ne’e husi Uniaun Europeia ko’alia hela kona-ba planu oinsá atu suporta instituisaun rua ne’e, agora daudaun iha faze diskusaun no sira mós sei kordena ho Instituto Camões iha Portugal.
