Iha loron 22 fulan julho tinan 2015, Delegação Parlamentar Indonésia (MPR.RI) ida mai visita Parlamento Nacional de Timor-Leste. Visita ne’e hahu hó visita de cortesia ba S. Exª Presidente do Parlamento Nacional iha ninia Gabinete.
Hafoin remata tiha visita de cortesia ba S. Exª Presidente do Parlamento Nacional, Grupu Parlamentar de Amizade Indonézia halo reuniaun ho Grupo Amizade Parlamentar Timor-Leste iha sala konferensia Parlamentu Nasional, hodi ko’alia kona-ba situasaun ne’ebé rai rua ne’e enfrenta.
Vise-prezidente Grupu Amizade Parlamentar Timor-Leste Indonézia, Deputadu Natalino dos Santos Nascimento iha abertura reuniaun ne’e fó agradesimentu ba ekipa tomak hussi Grupu Parlamentar de Amizade Indonézia nian, no fó introdusaun ba membro tomak Grupu Parlamentar de Amizade Timor Leste nian hanesan:
Paulo Moniz Maia Anastásia da Costa S. Amaral Aurélio Freitas Ribeiro Virgínia Ana Belo Manuel Guterres
Xefe delegasaun Grupo Parlamentar de Amizade Indonézia Bambang Sadono mós aproveita tempu ne’e hodi aprezenta nia membro delegasaun sira hanesan:
Martin Hutabarat Rambe Kamarulzaman TB Soenmandjaja Eddie Sireger
Acompanha mós Marcelinos Primanto Hendrasmoro (Embaixador Indonézia ba Timor-Leste)
Xefe delegasaun Grupu Amizade Parlamentar Indonézia Bambang Sadono hatete serbissu hamutuk entre Parlamentu Indonézia ho Timor-Leste ne’e sai hanesan fórum ida hodi buka solusaun ba problema tomak ne’ebé rai rua ne’e enfrenta, hanesan problema fronteira no setor sira seluk ne’ebé sai hanesan difikuldade ba nasaun rua ne’e.
Nune’e atu rezolve kazu fronteira presiza mós haree direitu nasional nasaun rua ne’e no liuliu mós direitu internasional hodi regula fronteira nasaun sira-nian.
Kestaun importante ida mak Grupo Amizade ne’e ko’alia kona-ba ruin Saudozo Presidente Nicolau Lobato nian ne’ebé durante ne’e seidauk hetan nia paradeiru loloos, inklui mós timoroan sira seluk ne’ebé militar Indonézia lori ba Indonézia hodi bele lori fila mai Timor-Leste.
TB Soenmandjaja, membru Grupu Parlamentar de Amizade Indonézia iha nia intervensaun hatete Parlamentu Indonézia mós haree hela lei hirak ne’ebé regula iha tinan 1999 hodi fó dalan ba eleisaun jeral ho nia resultado no seluk tan iha Timor-Leste.
Nia dehan Estadu Indonézia fiar Timor-Leste sei sai nasaun ne’ebé dezenvolvidu iha setor tomak iha futuru oin mai, no Indonézia mós kontinua hussu apoio kooperasaun entre rai rua ne’e hodi aselera dezenvolvimentu.
Entretantu Vise-prezidente Grupu Parlamentar de Amizade Timor-Leste, Deputadu Natalino dos Santos Nascimento hatete preokupasaun hirak ne’ebé Grupo Parlamentar de Amizade Indonézia apresenta ne’e pertinente tebes hodi resolve hamutuk iha futuru.
Tanba liuliu kazu fronteira terrestre nian presiza tebes buka solusaun ne’ebé di’ak, tanba populasaun sira ne’ebé hela iha fronteira rai rua ne’e iha relasaun kultural ne’ebé metin.
Natalino mós hussu ba autoridade Indonézia atu oinsá bele facilita viajem hussi Díli ba Oecússi ne’ebé dala-barak hetan dificuldade iha fronteira.
Nune’e mós Deputado Aurélio Freitas Ribeiro hatutan katak problema ne’ebé nasaun rua ne’e enfrenta la dook malu, nune’e importante tebes iha kooperasaun di’ak hodi rezolve dificuldade ne’ebé nasaun rua ne’e enfrenta.
Nia mós suporta tebes atu oinsá autoridade Indonézia bele hatudu ruin saudozo Prezidente Nicolau Lobato nian ne’ebé tinan barak povo tomak hein. Tanba Aurélio dehan iha Timor-Leste mós membro militar Indonézia barak mak nia ruin seidauk haloot hotu iha semiteriu militar ne’ebé prepara.
Allende ne’e hussu mós atu Governu Indonézia bele fasilita di’ak liután estudante timoroan sira ne’ebé halo estudu iha Indonézia iha prosesu aprendizazem.
Preokupasaun hirak ne’e Grupo Parlamentar de Amizade Indonézia Timor-Leste iha konkordansia ba malu hodi rezolve iha futuru oin mai.
