Pagina Inicial»Noticia
Prezidente Parlamentu Nasionál, Aniceto Longuinhos Guterres Lopes, akompaña husi Prezidente Komisaun G, ne’ebe trata asuntu Edukasaun Juventude Kultura no Sidadania, Deputadu Antonio Verdial de Sousa, simu audiénsia husi Sekretáriu Estadu Asuntu Edukasaun Portugal, António Leite ho nia ekipa, iha loron 16 fulan marsu tinan 2023, iha sala konferénsia Parlamentu Nasionál.
Durante reuniaun, Sekretáriu Estadu ne’e informa kona-ba nia observasaun no akompañamentu ba prosesu aprendijajen lian portugués iha Timor-Leste ne’ebe hari’i liu husi kooperasaun servisu entre Estadu Timor-Leste no Portugal.
Governante Portugal ne’e hatete maioria prosesu aprendijajen Eskola Portugués Ruy Cinatti Balide no Eskola CAFE iha munisipiu sira dezenvolve ho diak no iha futuru mai, liu husi kooperasaun ne’ebe iha ona , atu buka dalan oinsá hodi habelar Eskola CAFE iha Munisipiu Atauro, inklui posibildade seluk ne’ebe diak atu kontinua apoiu no hadia prosesu aprendijajen língua portugués iha Timor-Leste.
Prezidente Parlamentu Nasionál lori povu tomak nia naran, agradese no apresia ba profesor portugués sira ne’ebe koloka iha Timor-Leste, hodi hanorin estudante sira timoroan ho kualidade no kontribui ba dezenvolvimentu nasionál.
Prezidente Komisaun G mós sujere atu kontinua apoiu setor edukasaun liu husi kooperasaun ne’ebe iha ona hodi hakat ba nivel ensinu hotu iha Timor-Leste. FIM
