Pagina Inicial»Noticia
Parlamentu Nasionál liu husi sesaun plenária ordinária iha loron 13 fulan fevereiro tinan 2023, halo debate urjénsia ho governu liu husi Ministeriu Saude.
Debate urjénsia ne’e halo relasiona ho preokupasaun publiku kona-ba atendimentu ba pasiente sira liuliu inan ida-ne’ebe lakon vita hamutuk ho nia oan foin lalais ne’e iha Munisipiu Maliana.
Durante debate, Deputadu sira husu atu governu liuliu Ministeriu Saude halo esforsu maximu iha prosesu atendimentu ba pasiente sira iha área rural too nasionál.
Antes halo debate urjénsia, Deputadu sira halo uluk votu pezar ba vitima sira rai-nakdoko iha Turkia no Síria ne’ebe hamate populasaun barak.
Iha sesaun plenária ne’e mós Deputadu sira liu husi votasaun, autoriza Deputadu José Agostinho Sequeira Somotxo hodi presta deklarasaun hanesan testamuña iha prosesu judisial.
Entretantu iha intervensaun diversas nian, Deputadu sira kontinua sujere ba Governu at responde preokupasaun komunidade sira-nian liuliu infraestrutura hanesan ponte no estrada, tanba agora daudaun tempu udan ne’ebe difikulta movimentasaun komunidade sira-nian. FIM
