Pagina Inicial»Noticia
Iha loron 9 too 12 fulan janeiru tinan 2023, Sekretáriu-Jerál Parlamentu Nasionál, Adelino Afonso de Jesus, halo vizita ba Portugal hodi reforsa kooperasaun internasionál, ho objetivu atu promove no konsolida formasaun no kapasitasaun ba funsionáriu parlamentares.
Nune’e iha loron 9 no 10, realiza atividade barak ho Asembleia Repúblika Portugal. Iha reuniaun ho nia omólogu Asembleia Repúblika nian, diskuti rezultadu relatóriu avaliasaun final husi Programa Kooperasaun entre Asembleia Repúblika Portugal no Parlamentu Nasionál Timor-Leste 2017 – 2022, hanesan atividade hirak ne’ebe sei dezenvolve iha programa foun ba koopersaun entre Asembleia Repúblika Portugal no Parlamentu Nasionál Timor-Leste 2023 – 2025. Reuniaun ne’e ko’alia mós kona-ba ezekusaun programa sira ne’ebe foin termina no mantem nia ezekusaun no dedikasaun ba programa sira tinan 3 oin mai.
Iha loron tuir mai, delegasaun Parlamentu Nasionál halo reuniaun ho Prezidente Grupo Parlamentar de Amizade Portugal Timor-Leste, Deputadu António Prôa, ne’ebe louva kooperasaun entre parlamento rua atu buka hatene funsionamentu administrativu Parlamentu Nasionál. Hafoin ida-ne’e, Sekretáriu-Jerál akompaña husi nia omologu Albino de Azevedo Soares halo audiénsia ho Prezidente Asembleia Repúblika Portugal, Augusto Santos Silva, ne’ebe koloka karáter fundamental ba kooperasaun entre Parlamentu Nasionál Timor-Leste no Parlamento Português. Ikus husi servisu ne’e, Sekretáriu-Jerál Parlamentu Nasionál no Sekretáriu-Jerál Asembleia Repúblika Portugal hakat ba asinatura Relatóriu Avaliasaun Final ba Programa Kooperasaun entre Asembleia Repúblika Portugal no Parlamentu Nasionál Timor-Leste 2017 – 2022 no Programa Kooperasaun entre Asembleia Repúblika Portugal no Parlamentu Nasionál Timor-Leste 2023 – 2025.
Iha loron 11 fulan janeiru tinan 2023, delegasaun Parlamentu Nasionál halo reuniaun ho Professor Doutor Vítor da Conceição Gonçalves do ISEG (Instituto Superior de Economia e Gestão), hodi haree posibilidade estabelese protokolu kooperasaun ida entre Parlamentu Timor-Leste ho instituisaun portugueza ba ensinu superior.
Iha loron 12 fulan janeiru, iha parte dadeer, halo assinatura ba Memorandu Entendimentu entre Institutu Nasionál Administrasaun, I.P. no Parlamentu Nasionál Timor-Leste iha área Kapasitasaun Rekursu Umanu.
Ikus liu, iha loron hanesan halo mós Akordu Kooperasaun entre ISCTE-Instituto Universitário de Lisboa no Parlamentu Nasionál Repúblika Demokrátika Timor-Leste.
