Parlamentu Nasionál iha sesaun plenária ordinária, iha loron 10 fulan janeiru tinan 2023, realiza debate ho Governu liu husi Ministeriu Saude, kona-ba kampaña vasinasaun kontra Covid-19 no fornesimentu ai-moruk ba hospital no sentru saúde sira.
Durante debate, koalia liu kona-ba falta ai-moruk iha hospital no sentru saúde sira inklui kampaña vasinasaun iha munisipiu sira liuliu kapital Dili ne’ebe hahú ona ba 4 doze.
Iha sesaun plenária ne’e mós aprezenta relatóriu kona-ba partisipasaun iha reuniaun temátika UIP-CPLP kona-ba Mudansa Klimatika ho nia dezafiu ba dezenvolvimentu sustentável, iha Cabo Verde, iha loron 18 too 19 fulan jullu tinan 2022. No relatóriu kona-ba partisipasaun iha 145º Asembleia UIP, iha Kigali Ruanda, iha loron 11 too 15 fulan outubro tinan 2022.
Entretantu iha intervensaun diversa nian Deputadu sira aprezenta kona-ba preokupasaun komunidade sira-nian ba folin nesesidade bazika ne’ebe aumenta, professor kontratadu sira ne’ebe too agora seidauk sai permanente, situasaun seguransa rai-laran liuliu iha Kapital Díli no asuntu importante sira seluk. FIM
