Pagina Inicial»Noticia
Iha loron 23 to’o 24 fulan agostu 2022, Sekretariadu-Jeral Parlamentu Nasional Timor-Leste, liu husi Sentru Formasaun Parlamentar hala’o asaun formasaun ba 30 professor ensinu báziku , inkluindu diretor eskola no koordenador-sira, husi Munisipiu Dili-nian.
Asaun formasaun ne’e, realiza iha hotel JL Vila-Fatuhada, hanesan parte husi programa promosaun ba abertura no transparênsia Parlamentu Nasional no pretende mos atu forma grupu professor-sira iha polítika, prosedimentu no pedagojia ba dezenvolvimentu estratégia ba ensinu kona-ba Parlamentu, demokrasia, governasaun no sidadania. Iha loron dahuluk, formasaun proporsiona husi Dr. Armando Machado, ne’ebe lori professor-sira koñese ho detaillu Parlamentu Nasional, kompetênsia no funsionamentu nia órgaun-sira. Iha loron ikus formasaun, formadora Doutora Célia Oliveira esplora hamutuk ho formandu-sira promosaun ba valor-sira Parlamentu Nasional-nian iha kotekstu ensinu aprendijazem-nian.
Ikus husi formasaun, formandu-sira hatudu sira-nia satisfasaun relasiona ho inisiativa Parlamentu Nasional no sira dezafia Sekretariadu-Jeral atu transforma formasaun ne’e ba asaun formasaun ho karater kontinua, no estende ba professor-sira iha nível eskolaridade seluk no ba mos munisipiu-sira.
Iha abertura ba formasaun, konta ho prezensa Señor Sekretariu-Jeral Adjuntu, João Rui Amaral, Diretor Servisu Edukasaun Munisipiu Dili, Carlito da Silva, no Xefe Sentru Formasaun Parlamentar, Lino Soares de Carvalho. FIM.
