Pagina Inicial»Noticia
Parlamentu Nasionál liu husi sesaun plenária ordinária iha loron 24 fulan maiu tinan 2022, aprova ona Projetu Rezolusaun n.o 95/V(4ª) – kona-ba Loron Nasionál ba Liberdade Imprensa, ho 49 votus a favor, 0 kontra no 0 abstensaun.
Iha Projetu Rezolusaun ne’e, komemorasaun Loron Nasional ba Liberdade Imprensa sei realiza iha 16 fulan outubru kada tinan, maski iha opiniaun diferente balun husi Deputadu sira ba loron refere.
Hafoin aprovasaun, kontinua kedas ho aprezentasaun relatóriu anual 2021 nian husi Komisaun Funsaun Públika, ne’ebe lidera husi Prezidente Komisaun Funsaun Públika ho nia komisariu sira.
Iha intervensaun diversa, Deputadu sira aprezenta preokupasaun kona-ba folin konbustivel no nesesidade bazika ne’ebe kontinua aumenta iha merkadu, kondisaun eskola sira, labarik sira idade ki'ik ne’ebe kontinua faan sasan iha estrada ninin, inklui asuntu sira seluk.
Sesaun plenária ne’e mós, Meza Parlamentu Nasionál baixa ba Komisaun A no G, Projetu Lei kona-ba Kodigu Direitu ba Autor, baixa ba Komisaun A, Proposta Lei kona-ba Kodigu Rejistu Sivil no baixa mós ba Komisaun A no F kona-ba Proposta Lei alterasaun daruak ba Lei Sistema Saúde. FIM.
