Pagina Inicial»Noticia
Iha loron 3 too 6 fulan maiu tinan 2022, Parlamentu Nasionál organiza atividade ida hodi komemora Loron Mundial ba Língua Portuguesa, atu promove português no kultura iha português.
Selebrasaun ne’e hahú ho sesaun plenária iha português, no Deputadu sira halo aprovasaun ba votu kongratulasaun ba Loron Mundial Lingua Portuguesa, iha loron 5 fulan maiu, ho 52 votus a favor, 0 kontra no 0 abstensaun. Iha loron hanesan, Diresaun Rekursu Umanu no Formasaun, liu husi professora sira língua portuguesa iha Sentru Formasaun Parlamentar, promove konkursu online iha telemóvel ba kultura jerál kona-ba língua portuguesa, ho prezensa husi Deputadu sira, funsionáriu parlamentares no bankada parlamentares inklui asesor nasional no internacional sira.
Iha loron 5 fulan maiu, iha 14h00, funsionariu parlamentares assisti filme ida kona-ba “A língua, a luta, a nação” (2016) husi Max Stahl, iha Auditório do Arquivo & Museu da Resistência Timorense, hodi haklean koñesimentu iha língua portuguesa iha prosesu rezistensia no konstrusaun Timor-Leste.
Iha loron 6 fulan maio dadeer, joven finalista na’in sanulu ba konkursu hakerek “Eu cresci com a Independência” no Deputadu balun halo debate ho tema “20 anos depois, em que língua falamos?” iha Auditório da Fundação Oriente. Iha debate ne’e, joven sira hetan oportunidade hodi aprezenta no kestiona kona-ba politika ba língua portuguesa iha rai laran liuliu prosesu aprendijazen iha Timor-Leste, no aprezenta mós sujestaun balun kona-ba futuru português iha rai laran atu joven sira iha interesse ba lian ofisial ne’e. Atividade ne’e hetan prezensa husi Vise-Ministru Edukasaun, Juventude no Desportu, António Guterres, no Embaixadora Portugal iha Timor-Leste, Manuela Bairos.
Ikus liu, iha loron 6 fulan maiu, parte loraik, organiza seminário ida iha Auditório do Ministério dos Negócios Estrangeiros e Cooperação, ho tema “O Mundo em Português”. Orador nasional no internasional sira aprezenta dimensaun hotu liga ba língua portuguesa, aprezenta panorama no partilla kona-ba kultura, literatura, no história ba língua. No Sekretariu-Jeral Parlamentu Nasionál, Adelino Afonso de Jesus, halo aprezentasaun kona-ba manual no instrumentu ba ensinu português iha Parlamentu Nasionál, ne’ebe produz husi professora sira iha Sentru Formasaun Parlamentar husi Diresaun Rekursu Umanu no Formasaun.
Semináriu ne’e hetan prezensa husi Prezidente Parlamentu Nasionál, Aniceto Longuinhos Guterres Lopes, Vise-Prezidente Parlamentu Nasionál, Maria Angelina Sarmento, Ministra Negósiu Estranjeiru no Kooperasaun, Adaljiza Albertina Xavier Reis Magno, Embaixadora Portugal no Brasil iha Timor-Leste, Manuela Bairos no Maurício Medeiros de Assis, inklui Sekretáriu-Jeral no Xefia sira Parlamentu Nasionál, no seluktan.
Atividade Semana da Língua Portuguesa iha Parlamentu Nasionál organiza husi unidade organika oioin husi Sekretariadu Jeral Parlamentu Nasionál ho koordenasaun gabinete Relasaun Internasional no Kooperasaun.
