Pagina Inicial»Noticia
Parlamentu Nasionál iha sesaun plenária ordinária iha loron 29 fulan marsu tinan 2022, aprova votu pezar ba matebian António da Costa Lelan, hanesan Membru Asembleia Konstituinte, ne’ebé hakotu-iis iha semana kotuk. Votu pezar ne’e aprova ho 46 votu a favor, 0 kontra no 0 abstensaun.
Entretantu iha intervensaun diversa nian Deputadu sira preokupa ho kondisaun servisu Sentru Saude Comoro ne’ebé defisil atu halo atendimentu ba pasiente sira ho kuantidade boot, lixu iha kapital Díli ne’ebé kontinua sai preokupasaun populasaun sira-nian tanba tinan barak ladauk rezolve problema lixu ho efetivu, retroativu ba professor sira balun seidauk simu, inklui asuntu importante sira seluk.
Hatan ba preokupasaun sira ne’e, Sekretáriu Estadu ba Asuntu Komunikasaun Sosial, Mericio Juvenal Akara, hatete Governu kontinua rezolve preokupasaun populasaun sira-nian liu husi Orsamentu Jeral Estadu inklui ho apoiu husi Instituto Jestaun Ekipamentu (IJE) hodi normaliza infraestrutura sira ne’ebe konsidera emerjensia.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira no hetan prezensa husi Sekretáriu Estadu ba Asuntu Komunikasaun Sosial, Mericio Juvenal Akara.
