Pagina Inicial»Noticia
Prezidente Parlamentu Nasionál, Aniceto Longuinhos Guterres Lopes, halo reuniaun bilaterál ho Sekretariu Ezekutivu Comprehensive Test Ban Treaty (CTBTO), Robert Floyd, iha Bali Indonezia, hafoin reuniaun UIP.
Reuniaun bilateral ne’e ho objetivu atu diskute kona-ba pozisaun Timor-Leste ba asuntu “Tratadu Interdisaun Kompleta ba Dezarmamentu Nuklear ka CTBTO”.
Parlamentu Nasionál sei kontinua hein desizaun no aprovasaun husi Konsellu Ministru, molok prosede ba ratifikasaun iha Parlamentu Nasionál.
Hafoin reuniaun bilateral, iha loron tuir mai, Prezidente Parlamentu Nasionál halo mós reuniaun bilateral ho Prezidente Uniaun Interparlamentar, Duarte Pacheco hodi diskute kona-ba kooperasaun entre Parlamentu Nasionál Timor-Leste ho UIP iha futuro.
Timor-Leste sujere ba Prezidente UIP atu haree oinsá grupu CPLP no g7+ bele sai hanesan observadores ba UIP.
Hatan ba kestaun ne’e, Prezidente UIP informa katak, UIP sei halo avaliasaun no estudu kle’an ba observador sira atuál ba sira nia kontribuisaun no partisipasaun ativa iha ambitu reuniaun UIP. Felizmente, inisiativa ne’e diak tebes, hodi bele konsidera iha Reuniaun Asembleia UIP tuir mai iha Ruanda.
Prezidente UIP mós sujere atu Timor-Leste sai Anfitrião ka Uma-na’in ba Reuniaun Grupu G20 husi nasaun CPLP iha Díli, entre loron 4 too 5 outubru, molok reuniaun grupu G20 iha Jakarta, Indonézia iha loron 6 no7 outubru tinan 2022. FIM.
