Pagina Inicial»Noticia
Iha ámbitu komemorasaun tinan 20 Konstituisaun Repúblika Demokrátika Timor-Leste no servisu sira ne’ebé halo husi Asembleia Konstituinte, iha tinan 2022 Parlamentu Nasionál organiza atividade lubuk-ida atu komemora loron istóriku ho nia demokrasia.
Iha loron 7 fulan fevereiru tinan 2022, Prezidente Parlamentu Nasionál, Aniceto Longuinhos Guterres Lopes, akompaña husi Membru Meza no Deputadu sira, halo lansamentu ba portal ne’ebé oferece informasaun kona-ba Asembleia Konstituinte ho nia servisu sira hanesan dokumentu husi grupo trabalho. Tanba menus dokumentasaun iha tempu Asembleia Konstituinte, nune’e ekipa Sekretariadu kontinua servisu hodi kompleta liu husi atividade sira.
Atividade daruak ba komemorasaun tinan 20 Konstituisaun Repúblika Demokrátika Timor-Leste halo lansamentu ba konkursu eskrita kriativa ho tema “Eu Cresci com a Independência” iha 9 fevereiru 2022, ho objetivu atu hatene koñesimentu timoroan sira ne’ebé la moris iha ameasa laran durante okupasaun territorial ka timoroan ne’ebé moris hafoin tinan 1999. Tuir regra ne’ebé estabelese, Parlamentu Nasionál simu 32 kandidatura, ne’ebé selesiona testu sira husi júri ne’ebé mai husi elementu internu no esternu Parlamentu Nasionál, nune’e iha loron 10 fulan marsu tinan 2022, hakat ba faze tuir mai halo entrevista no hetan rezultadu iha loron 15 fulan marsu tinan 2022 kandidatu sira defende ida-idak nia testu nune’e hetan rezultadu final hanesan tuir mai ne’e;
1.º lugar
Nelson Moniz da Costa
2.º lugar
Leticia B. C. Ramalho
3.º lugar
Cizánia Moreira dos Reis da Silva
4.º lugar
Paulino S. D. Barreto
Iha loron 5 fulan maiu, finalista na’in sanulu sei partisipa iha debate “Em que língua comunicamos?” ho Deputadu sira no vencedor na’in haat simu sira-nia premiu.
Alem de ne’e iha loron 21 fulan marsu tinan 2022, Reverendísimu Arcebispo Metropolitano Díli prezide misa agradesimentu ba tinan 20.º Aniversáriu Konstituisaun RDTL, iha Igreja Katedrál Díli.
Entretantu iha 22 fulan marsu tinan 2022, Deputadu sira liu husi Sesaun Plenária, halo voto kongratulasaun ba tinan 20 Asinatura Konstituisaun Repúblika Demokrátika Timor-Leste no serimónia selebrasaun tinan 20 Aprovasaun Konstituisaun Repúblika Demokrátika Timor-Leste, ho lansamentu edisaun espesiál ida Konstituisaun Repúblika Demokrátika Timor-Leste, inklui abertura ba espozisaun kona-ba Asembleia Konstituinte ne’ebé realiza iha edifísiu Parlamentu Nasionál too loron 20 fulan maiu tinan 2022, hafoin ida-ne’e realiza mós iha munisípiu sira no RAEOA.
