Pagina Inicial»Noticia
Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira, Deputadu sira, Sekretáriu Estadu Komunikasaun Sosiál, Mericio Juvenal Akara, Sekretáriu-Jerál Adjunto Parlamentu Nasionál ho nia funsionáriu sira, lansa link portal ba Komemorasaun Tinan 20 Konstituisaun Repúblika Demokrátika Timor-Leste, iha loron 7 fulan fevereiro tinan 2022, iha entrada prinsipál Parlamentu Nasionál.
Sekretáriu-Jerál Adjunto Parlamentu Nasionál, João Rui Amaral, iha nia intervensaun hatete iha link refere koloka kona-ba atividade liuliu dokumentu diskusaun sira hanesan Projetu ba Konstituisaun, konsultasaun publika, testu final ne’ebé aprovado, estrutura no funsionamentu, fotografia no vídeo kona-ba diskusaun sira kona-ba Konstituisaun RDTL iha Asembleia Konstituinte.
Sekretáriu-Jerál Adjunto rekoñese menus dokumentasaun iha tempu Asembleia Konstituinte nian, maibé ho komemorasaun refere ekipa sekretariadu kontinua hodi kompleta liu husi implementasaun atividade sira seluk no promosaun sira hanesan lansamentu volume I transkrisaun servisu Asembleia Konstituinte nian, edisaun espesiál ba Konstituisaun, Konstituisaun Juvenil, no atividade sira seluk.
Prezidente Parlamentu Nasionál iha diskursu lansamentu ne’e hatete, lansamentu link portal ne’e hanesan inicio ba Komemorasaun Tinan 20 Konstituisaun Repúblika Demokrátika Timor-Leste, ne’ebé sei halo sesaun solene ba tinan 20 asinatura Konstituisaun RDTL iha loron 22 fulan Marsu tinan 2022.
Timor-Leste orgullu tanba iha nia Konstituisaun rasik ne’ebé bele guia funsionamentu Estadu Direitu Demokrátiku ne’ebé hakerek iha Konstituisaun RDTL.
Prezidente Parlamentu Nasionál enkoraja sidadaun hotu atu akompaña no halo leitura ba Konstituisaun atu hatete kona-ba espíritu husi Konstituisaun ne’e rasik. FIM.
