Pagina Inicial»Noticia
Parlamentu Nasionál liu husi sesaun plenária iha loron 31 fulan janeiro tinan 2022, halo debate urjénsia ho Ministériu Saúde kona-ba moras dengue ne’ebé kontinua aumenta iha Timor-Leste liuliu kapitál Díli.
Iha debate urjénsia ne’e Ministra Saúde, Odete Maria Freitas Belo, halo aprezentasaun ba situasaun jerál kona-ba moras dengue iha Timor-Leste ho nia medida sira prevensaun nian.
Hafoin aprezentasaun husi Ministra Saúde, Komisaun F ho GMPTL aprezenta relatóriu vizita fiskalizasaun ba hospital no klínika sira iha semana kotuk, hodi Ministériu Saúde bele konsidera.
Durante diskusaun, Deputadu sira sujere ba Ministériu Saúde atu halo medida sira prevensaun ho másimu no kria kondisaun sufisiente ba pasiente sira hodi bele halo tratamentu.
Deputadu sira husu atu Ministériu Saúde kontinua rega susuk iha bairru sira iha territóriu tomak atu prevene moras dengue.
Debate urjénsia ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira no hetan prezensa husi Ministra Saúde, Odete Maria Freitas Belo, ho nia ekipa.
