Pagina Inicial»Noticia
Prezidente Parlamentu Nasionál, Aniceto Longuinhos Guterres Lopes, iha loron 26 fulan janeiro tinan 2022, simu audiénsia husi Prezidente Tribunal Rekursu, Deolindo dos Santos no Prokuradór Jerál Repúblika, Alfonso Lopes, iha gabinete Prezidente nian.
Iha audiénsia ho Prezidente Tribunal Rekursu ne’ebé hala’o iha 09h00 ne’e ko’alia kona-ba deklarasaun riku soin Deputadu sira-nian ba Tribunal Rekursu. Tanba ne’e presiza iha koordenasaun hodi Deputadu sira, membru Governu sira inklui Prezidente Repúblika rasik oinsá atu prenxe formuláriu iha Tribunal Rekursu nian.
Prezidente Parlamentu Nasionál sei informa ba Deputadu sira liu husi sesaun plenária atu oinsá bele prenxe formuláriu eletrónika ba deklarasaun riku soin nian.
Entretantu reuniaun entre Prokuradór Jerál Repúblika ho Prezidente Parlamentu Nasionál ne’ebé hala’o iha 11h00 ne’e ko’alia kona-ba relacionamento institusionál liuliu Ministériu Públiku ho Parlamentu Nasionál liga ho inisiativa lejizlativa sira ne’ebé tama Parlamentu Nasionál.
Além de ne’e lei hirak ne’ebé promulgado ona hanesan Lei Prevensaun no Kombate Korrupsaun ne’e presiza lei komplementár hodi implementa, tanba ne’e komunikasaun no relacionamento institusionál ne’e importante tebes atu aselera prosesu sira ne’e. FIM
