Pagina Inicial»Noticia
Komisaun E ne’ebé trata asuntu infraestrutura aprezenta nia relatóriu fiskalizasaun ba Munisípiu Ermera, Manatuto, Baucau no Ainaro husi fulan Juñu no Jullu 2021 nian, iha sesaun plenária, iha loron 24 fulan janeiro tinan 2022.
Relatóriu ne’e mensiona kona-ba atividade tomak durante fiskalizasaun ne’ebé identifika kondisaun real infraestrutura nian iha munisípiu sira.
Iha sesaun plenária ne’e mós aprova votu pesar ba matebian saudozu Filomeno da Câmara no votu solidariedade ba vitima sira erupsaun vulkániku iha Tonga.
Entretantu iha intervensaun diversa nian Deputadu sira kontinua alerta ba Governu atu kombate kazu dengue iha Timor-Leste tanba hamate ona labarik barak, kondisaun estrada no ponte iha munisípiu sira balun aat ona inklui asuntu importante sira seluk.
Ministru Asuntu Parlamentar no Komunikasaun Sosiál, Francisco Jerónimo hatete Governu liu husi Ministériu Saúde, kontinua halo kampaña públiku ba prevensaun no kombate dengue iha Timor-Leste liuliu iha kapitál Díli. Kona-ba estrada no ponte, Ministériu Obras Públicas liu husi Instituto Jestaun Ekipamentu kontinua halo normalizasaun ba área ne’ebé identifika risku no aselera planu dezenvolvimentu infraestrutura tuir planu no programa ne’ebé aprovado ona.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru sira Meza nian no hetan prezensa husi Ministru Asuntu Parlamentar no Komunikasaun Sosiál.
