Parlamentu Nasionál iha sesaun plenária ordinária iha loron 18 fulan janeiro tinan 2022, aprova ona Projetu Rezolusaun Parlamentu Nasionál n.o 85/V(4ª) – Ne’ebé Institui Loron Nasionál ba Tais, ho 47 votu a favor, 0 kontra no 0 abstensaun.
Iha sesaun plenária ne’e mós, Komisaun D aprezenta nia relatóriu fiskalizasaun ba Munisípiu Ainaro iha fulan outubro 2021.
Entretantu iha intervensaun Deputadu sira-nian ko’alia kona-ba ekipa linha frente balun ne’ebé too agora seidauk simu sira-nia direitu, jestaun lixo iha kapitál Díli, preokupasaun professor sira-nian inklui asuntu sira seluk.
Ministru Asuntu Parlamentares no Komunikasaun Sosiál, Francisco Jerónimo, hatete preokupasaun hirak ne’e sei aprezenta ba ministériu relevante sira hodi rezolve tuir planu no programa ne’ebé mak iha.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira no hetan prezensa husi Ministru Asuntu Parlamentares no Komunikasaun Sosiál.
